15.09.2026 | 18:30
«Դաշնակցական բոլշևիզմ»-ից մինչև «ՀՀՇ-ի ծիլեր». գաղափարախոսական պարադոքս՝ ԱԺ-ում. ՏԵՍԱՆՅՈՒԹ
Հունգարիան սպառնում է արգելափակել ԵՄ-ի հետ Ուկրաինայի անդամակցության բանակցությունները
Քաղաքականություն
07.11.2023 | 20:28
Բուդապեշտը կարգելափակի ԵՄ-ի հետ Ուկրաինայի անդամակցության բանակցությունների մեկնարկը, մինչև չկատարվեն Հունգարիայի պահանջները, որոնք նախատեսված են կրթության լեզվի մասին ուկրաինական օրենքով։ Այս մասին հոլանդական NOS հեռուստաընկերությանը տված հարցազրույցում ասել է Հունգարիայի վարչապետի աշխատակազմի քաղաքական հարցերով տնօրեն Բալաշ Օրբանը, փոխանցում է Korrespondent-ը։
«Հունգարիան միշտ եղել է Եվրամիության հետ Ուկրաինայի մերձեցման կողմնակիցը։ Սակայն լեզվի ավելի խիստ օրենքը փոխել է ամեն ինչ։ Մենք արգելափակելու ենք բանակցություններն այնքան ժամանակ, քանի դեռ խնդիրը չի լուծվել»,- հայտարարել է Բալաշ Օրբանը։
Պաշտոնյան այս պատասխանն է տվել հարցին՝ արդյո՞ք Հունգարիան կխոչընդոտի ԵՄ-ին Ուկրաինայի անդամակցության շուրջ բանակցությունների մեկնարկը։ Պաշտոնական Բուդապեշտի ներկայացուցիչը պնդել է, որ «նոր օրենքներն անտանելի են դարձրել հունգարացիների կյանքը Ուկրաինայում»։
«Նոր օրենքի» տակ պետք է հասկանալ Ուկրաինայում ընդունված օրենքը, որը պարտավորեցնում է ազգային փոքրամասնություններին սովորել ոչ միայն իրենց մայրենի լեզվով, այլև իրենց կրթության առնվազն 70 տոկոսը ստանալ ուկրաիներենով։
Հունգարիան կարծում է, որ երեխաները, ովքեր մեծանում են Ուկրաինայում հունգարախոս ընտանիքներում, «զգալիորեն հետ կմնան իրենց ուսման մեջ»։
«Հունգարիայի դիրքորոշումը բացարձակապես պարզ է. քանի դեռ այս օրենքը գոյություն ունի, ուկրաինացիների հետ չեն կարող քննարկումներ լինել Եվրամիությանը նրանց ինտեգրման շուրջ»,- ասել է Բալաշ Օրբանը։
Հիշեցնենք, որ ավելի վաղ էլ Հունգարիան արգելափակել էր ԵՄ-ի կողմից Ուկրաինային տրամադրվող 500 միլիոն եվրոյի օգնության փաթեթը:
