23.07.2026 | 23:28
Կապանը` ԱՊՀ 2026 թվականի երիտասարդական մայրաքաղաք
Թուրքիան հերքել է պաղեստինցիներին ընդունելու՝ Իսրայելի հետ համաձայնության մասին լուրերը
Քաղաքականություն
07.11.2023 | 15:35
Թուրքիայի նախագահի աշխատակազմը հերքել է նախագահ Ռեջեփ Թայիփ Էրդողանի և Իսրայելի վարչապետ Բենիամին Նեթանյահուի միջև ենթադրյալ համաձայնության մասին տեղեկություններն այն մասին, թե Անկարան պատրաստ է մեկ միլիոն պաղեստինցիների ընդունել, փոխանցում է ՌԻԱ Նովոստին։
Թուրքական մի շարք ընդդիմադիր լրատվամիջոցներում և սոցիալական ցանցերում տեղեկություններ էին հայտնվել, որ Էրդողանը, իբր, համաձայնել է Թուրքիայում ընդունել մեկ միլիոն պաղեստինցի փախստականների՝ գումարի դիմաց։
«Որոշ սոցիալական ցանցերում տարածված հաղորդագրությունը՝ վկայակոչելով Նեթանյահուի հայտարարությունը, թե «մենք պայմանավորվել ենք Էրդողանի հետ, որ երկու միլիարդ դոլարի դիմաց 1 միլիոն պաղեստինցի կդառնա Թուրքիայի քաղաքացի և կապրի Թուրքիայում», ճիշտ չէ։ Ո՛չ մեր նախագահ Ռեջեփ Թայիփ Էրդողանի կողմից բանակցություններ են եղել, ո՛չ էլ Իսրայելի վարչապետ Բենիամին Նեթանյահուն է նման հայտարարություն արել։ Այս պնդումները լիովին կեղծ են»,- ասված է Թուրքիայի նախագահի աշխատակազմի հաղորդակցությունների տնօրինության ապատեղեկատվության դեմ պայքարի կենտրոնի հաղորդագրությունում։
