07.10.2026 | 15:10
ՀՀ-ում հրթիռների արտադրության հարցի քննարկում Դելիի հետ՝ ըստ ԶԼՄ-ի // Երևանում փակ փողոցներ կլինեն․ ԼՈՒՐԵՐ
ԵՄ-ն Ուկրաինայի և Մոլդովայի հետ կարող է անդամակցության բանակցություններ սկսել 2024 թվականին
Քաղաքականություն
07.11.2023 | 14:42
Եվրահանձնաժողովը (ԵՀ) մտադիր է առաջարկել Ուկրաինայի և Մոլդովայի՝ ԵՄ-ին անդամակցության շուրջ բանակցություններ սկսել, սակայն պայմանով, որ երկու երկրները կկատարեն մնացյալ պահանջները։ Այս մասին գրում է Reuters-ը՝ վկայակոչելով ԵՄ երկու անանուն աղբյուրների։
Ըստ գործակալության՝ սա նշանակում է, որ Կիևի և Քիշնևի հետ Եվրամիությանն անդամակցելու պաշտոնական բանակցությունները կարող են սկսվել արդեն 2024 թվականին։
Նոյեմբերի 8-ին Եվրահանձնաժողովը ներկայացնելու է իր հաջորդ զեկույցը Ուկրաինայի և Մոլդովայի՝ ԵՄ անդամության թեկնածուի կարգավիճակ ստանալու ուղղությամբ յոթ կետերի իրագործման հարցում առաջընթացի վերաբերյալ, որոնք Բրյուսելը պահանջում է կատարել: Այս զեկույցի հիման վրա Եվրամիության 27 երկրների պետությունների և կառավարությունների ղեկավարները դեկտեմբերին կայանալիք գագաթնաժողովում կորոշեն ԵՄ-ին անդամակցելու շուրջ Կիևի և Քիշնևի հետ բանակցություններ սկսելու նպատակահարմարությունը:
Հավելենք, որ Ուկրաինան վաղուց է ձգտում սկսել Եվրամիությանն անդամակցության պաշտոնական բանակցությունները։ Մի քանի օր առաջ Եվրահանձնաժողովի նախագահ Ուրսուլա ֆոն դեր Լեյենը, ելույթ ունենալով Ուկրաինայի Գերագույն ռադայում, նշել էր, որ Կիևն իր խնդիրները կատարել է 90 տոկոսով։
