Քաղաքականություն
06.11.2023 | 18:31
Անկարայում ավարտվել է Թուրքիայի արտգործնախարար Հաքան Ֆիդանի և ԱՄՆ պետքարտուղար Էնթոնի Բլինքենի հանդիպումը։ Ֆիդանը և Բլինքենը երկկողմ հանդիպումներ են անցկացրել նեղ և ընդլայնված կազմով։ Բանակցությունները տևել են շուրջ 2,5 ժամ։
Ֆիդանի և Բլինքենի բանակցություններից հետո հայտարարություններ չեն եղել։ Հանդիպումից հետո ԱՄՆ պետքարտուղարը լքել է ԱԳՆ շենքը։
Թուրքական Անադոլու գործակալությունը, իր դիվանագիտական աղբյուրներին վկայակոչելով, հայտնել է, թե հանդիպմանը ինչ հարցեր են քննարկվել։ Նշվում է, որ Ֆիդանը Բլինքենի հետ զրույցում ընդգծել է, որ Իսրայելը պետք է դադարեցնի հարձակումները խաղաղ բնակչության վրա և տեղահանումը Գազայում, և որ անհապաղ պետք է հայտարարվի ամբողջական զինադադար։
Հանդիպման ընթացքում, որը ներառել է մտքերի փոխանակում Գազայի հատվածի վերաբերյալ, երկու կողմերն էլ հաստատել են, որ պայմանավորվել են ապահովել, որ խաղաղ բնակիչները չվնասվեն, և մարդասիրական օգնությունը տրամադրվի շարունակական ու անխափան:
«Թուրքիան և ԱՄՆ-ը համաձայն են Գազայում խաղաղ բնակչությանը վնաս չպատճառելու, մարդասիրական օգնություն տրամադրելու անհրաժեշտության և երկու պետությունների լուծման հարցում: Այսօրվա հանդիպմանն ընդգծվել է, որ մենք միասին ենք երկու պետությունների խնդիրը լուծելու համար»,- ասել է գործակալության աղբյուրը։
Ֆիդանը նաև ասել է, որ Գազայում քաղաքացիական օբյեկտների ռմբակոծումը և ենթակառուցվածքների ոչնչացումն անընդունելի են։
Հաղորդվում է, որ հանդիպման ընթացքում քննարկվել են նաև Շվեդիայի անդամակցության շրջանակում ՆԱՏՕ-ի ընդլայնման գործընթացը, երկկողմ ու տարածաշրջանային հարցեր։
Էմմա Չոբանյան
