15.12.2024 | 21:00
Այսօր երիտասարդներն ավելի ինքնուրույն են, բայց պակաս տեղեկացված. ապաքաղաքական զրույց Անուշ Ասլիբեկյանի հետ․ ՏԵՍԱՆՅՈՒԹ
50 լուսանկարիչ, 5 օր հայկական միջավայրում. FIAP-ն առաջին անգամ Հայաստանում էր
06.11.2023 | 11:55
50 լուսանկարիչ աշխարհի տարբեր երկրներից 5 օր շրջել է Հայաստանով, լուսանկարել գյուղական կյանքն ու առօրյան, պատմամշակութային հուշարձանները` միաժամանակ ծանոթանալով հայկական մշակույթին և ավանդույթներին:
Պրոֆեսիոնալ և սիրողական լուսանկարչությամբ զբաղվող լուսանկարիչները Հայաստանում էին FIAP միջազգային լուսանկարչական միության նախաձեռնության շրջանակում։ FIAP-ի անդամ է շուրջ 3 միլիոն լուսանկարիչ աշխարհի ավելի քան 90 երկրից։ Հայաստանը FIAP-ին միացել է 2016 թվականին, պաշտոնական ներկայացուցիչը լուսանկարիչ Վիգեն Մնոյանն է։ Նրա խոսքով՝ միջազգային լուսանկարչական միության խորհուրդը ամեն տարի ասամբլեա է անցկացնում անդամ երկրներից որևէ մեկում, քննարկում է կառույցի գործունեությունը և անելիքները, իսկ այս տարվա համար ընտրվել է Հայաստանը։
«Մենք կարողացանք այս տարի համոզել և FIAP-ը Հայաստան բերել։ Չեմ կարող ասել, որ հեշտ էր։ Այս ամենը նպաստում է մեր երկրի ճանաչելիությանը, նման լուսանկարիչները շրջում են քո երկրում, լուսանկարում և այդ ամենը հասանելի դարձնում միջազգային հանրությանը՝ տարբեր ցուցահանդեսների միջոցով, սոցիալական հարթակների հրապարակումներով»,- ասում է լուսանկարիչը։
Մնոյանի խոսքով՝ փորձել են Հայաստանը տարբեր անկյուններից ներկայացնել միջազգային գործընկերներին՝ ընդգրկելով նաև տարբեր լուսանակարչական ոճեր:
Լուսանկարիչները այցելել են Տավուշի մարզի Խաչարձան գյուղ, որտեղ լուսանկարել են գյուղի մարդկանց կյանքն ու առօրյան, մասնակցել են գյուղական ճաշկերույթի, ապա եղել են Գոշավանք վանական համալիրում, լուսանկարել հուշարձանը, «ասեղնագործ» խաչքարերը և տեղի բնակչությանը։
«Մեր ժողովուրդը բաց է, շփվող է և լուսանկարիչների համար հետաքրքիր է նրանց լուսանկարել»,- ասում է Մնոյանը։
FIAP-ը Հայաստան բերելու մեջ իր ներդրումն է ունեցել արմատներով արցախցի, Չեխիայի լուսանկարիչների միության նախագահ Գարիկ Ավանեսյանը։ Լուսանկարիչը պատմում է՝ տարվա մեջ մի քանի անգամ միջազգային լուսանկարիչների այց է կազմակերպում Հայաստան։ FIAP միջազգային լուսանկարչական միության շրջանակում հնարավոր եղավ կազմակերպել ավելի մեծ թվով լուսանկարիչների այց։
«Որքան շատ լինեն այսպիսի պրոֆեսիոնալիզմի լուսանկարիչների այցերը Հայաստան, այնքան մեծ կլինի հնարավորությունը միջազգային հանրությանը պատմել հայերի և հայկական ապրելակերպի ու արժեքների մասին», – ասում է Գարիկ Ավանեսյանը։
Ավանեսյանը ակտիվ գործնեություն է ծավալում թե՛ կոմմերցիոն, թե՛ վավերագրական լուսանկարչության բնագավառներում։ 2002-ից նա հրատարակում է եռալեզու Photo Art ամսագիրը, որը մեծ ճանաչում է վայելում Չեխիայում և արևելաեվրոպական մի շարք երկրներում։ Բազմաթիվ վավերագրական շարքեր ունի հատկապես Արցախի մասին։
«30 տարի ես Արցախը լուսանկարել եմ, և միայն այսօր սկսում եմ այդ լուսանկարները հրապարակել սոցիալական հարթակներում։ Իսկ մարդիկ այդ լուսանկարներում գտնում են իրենց գյուղը, բակը, հարևանին ու ուսուցչին։ Այդ լուսանկարներում նրանց հիշողություններն են, կյանքը Արցախում»,- ասում է Ավանեսյանը։
Լուսանկարիչը մեկ սովորություն ունի․ սիրում է լուսանկարել մարդկանց, իսկ հաջորդ տարի գալ Հայաստան և լուսանկարները փոխանցել իր հերոսներին։ Վիգեն Մնոյանն էլ շեշտում է՝ փորձելու են FIAP-ի շրջանակներում այլ միջոցառումներ ևս Հայաստանում կազմակերպել:
Անի Թամրազյան
Լուսանկարները` Վիգեն Մնոյանի, Արամ Սալոյանի
