30.04.2026 | 10:39
Նավթի գներն աճել են
Հայաստանին աջակցելու` Բլինքենի հայտարարությունները Բաքվի դժգոհությունն են առաջացրել
Քաղաքականություն
02.11.2023 | 18:04
ԱՄՆ Պետքարտուղարության, ինչպես նաև անձամբ պետքարտուղար Էնթոնի Բլինքենի՝ Հայաստանին սատարող հայտարարությունները Բաքվում դժգոհություն են առաջացրել։ Մասնավորապես, Ադրբեջանի ԱԳՆ խոսնակ Այխան Հաջիզադեն հայտարարել է, թե «չնայած այն հանգամանքին, որ Միացյալ Նահանգները տասնամյակներ շարունակ միջնորդ է եղել, ցավոք, երբեք այսքան խստորեն չի խրախուսել աջակցել Ադրբեջանի ինքնիշխանությանը և տարածքային ամբողջականությանը, ադրբեջանցի փախստականներին տեղահանվածներին մարդասիրական օգնություն տրամադրելու հարցին»։
Նա նշել է, թե «ԱՄՆ-ը Հայաստանին ուղղորդել է սխալ ուղղությամբ, որպեսզի պաշտպանի անջատողականների անօրինական գործունեությունը, հնարավորություն ստեղծել նրանց ԱՄՆ այցերի համար, հատկացրել է ֆինանսական միջոցներ»։
«Ադրբեջանի դեմ ցանկացած նոր գործողություն չի բերի դրական արդյունքի, այդ գործողություններին կտրվի համարժեք պատասխան»,- ասել է Հաջիզադեն։
Հիշեցնենք, որ ԱՄՆ Սենատում լսումների ժամանակ Բլինքենը հայտարարել էր Հայաստանի տրվելիք ֆինանսական աջակցության մասին՝ Լեռնային Ղարաբաղից փախստականների հոսքով պայմանավորված։
Բացի այդ, ԱՄՆ Պետքարտուղարությունը վերահաստատել էր իր վճռական աջակցությունը Հայաստանի ինքնիշխանությանն ու տարածքային ամբողջականությանը՝ պատասխանելով «Ամերիկայի ձայնի» հայկական ծառայության հարցմանը։
Էմմա Չոբանյան
