Թուրքիայի դատական համակարգում կոռուպցիան մեծ չափերի է հասել. Էրդողանին հատուկ զեկույց է ներկայացվել

Թուրքիայի նախագահ Ռեջեփ Թայիփ Էրդողանին է ներկայացվել երկրի Ազգային հետախուզական կազմակերպության (MİT) զեկույցը դատական համակարգում կոռուպցիայի վերաբերյալ։ Դատական իշխանությունն արդեն քննադատության ենթարկվել է միջազգային կազմակերպությունների և իրավապաշտպան խմբերի կողմից՝ գործադիր իշխանության հրահանգներին հետևելու համար նույնիսկ մինչ կոռուպցիոն մեղադրանքները, գրում է Turkish Minute-ը։

Թուրքիայում ավելի քան 4000 դատավորներ և դատախազներ աշխատանքից հեռացվել են 2016 թվականի հուլիսին ձախողված ռազմական հեղաշրջումից անմիջապես հետո՝ կապված Գյուլենի կրոնական շարժման հետ ենթադրյալ կապերի հետ, որին մեղադրում էին հեղաշրջման փորձը կազմակերպելու համար: Շարժումը հերքում է իր մասնակցությունը հեղաշրջմանը։

Ստամբուլի գլխավոր դատախազ Իսմայիլ Ուչարը նամակ է հղել Դատավորների և դատախազների խորհրդին (HSK)՝ բացահայտելով երկրի դատական համակարգում առկա կոռուպցիան: HSK-ի գլխավոր քարտուղարի գրասենյակ ուղարկված նամակում Ուչարը մանրամասնել է կաշառակերության, նեպոտիզմի և դատական համակարգի այլ խախտումների մասին մեղադրանքները: Նամակում նաև մեղադրանքներ են ներկայացվել Ստամբուլի դատական հանձնաժողովի նախագահ Բեքիր Ալթունին։

Հաղորդվում է, որ MİT-ի այս զեկույցը քննում է դատավորներին և դատախազներին, որոնք վերջին վեց տարիների ընթացքում կասկածելի որոշումներ են կայացրել, մասնավորապես՝ Ստամբուլում և Անկարայում: Զեկույցը բացահայտում է փաստաբանների, դատավորների և դատախազների միջև կապերը՝ կենտրոնանալով հարյուրավոր գործերի վրա: Այն նաև բացահայտում է դատավորներին և դատախազներին, որոնք գրավի և կալանավորման մասին կասկածելի որոշումներ են կայացրել, հաճախ՝ փողի դիմաց:

Զեկույցը հրապարակվում է այն ժամանակ, երբ դատական համակարգում կոռուպցիայի մասին մեղադրանքները հասել են առավելագույնին, ինչն էլ դրդել է MİT-ին քայլեր ձեռնարկել:

Լրատվամիջոցները հայտնում են, որ Էրդողանն արդեն հանդիպումներ է ունեցել MİT-ի պաշտոնյաների հետ՝ քննարկելու արդյունքները։

Նշվում է, որ զեկույցը կարող է հանգեցնել դատական համակարգում զգալի փոփոխությունների, այդ թվում՝ հնարավոր վերանշանակումների։

Էմմա Չոբանյան