02.11.2024 | 15:28
ԱԺ հանձնաժողովի անդամները մասնակցել են ԵՄ խորհրդարանների ԵՄ հարցերով հանձնաժողովների համաժողովին
Ֆրանսիան և Ղազախստանը պայմանավորվել են ռազմավարական օգտակար հանածոների ոլորտում համագործակցության շուրջ
Քաղաքականություն
01.11.2023 | 19:42
Ֆրանսիայի նախագահ Էմանուել Մակրոնը և Ղազախստանի նախագահ Կասիմ-Ժոմարտ Տոկաևը ստորագրել են ռազմավարական օգտակար հանածոների ոլորտում համագործակցության հռչակագիր, որը ներառում է ուրան։ Ֆրանսիայի նախագահի այցի ընթացքում, ընդհանուր առմամբ, ստորագրվել է վեց պայմանագիր, հայտնում է Ղազախստանի նախագահի մամուլի ծառայությունը։
Ղազախստանի նախագահը նշել է, որ հանդիպմանը հատուկ ուշադրություն է դարձվել երկրների միջև առևտրատնտեսական հարաբերությունների զարգացմանը, ինչը «հատկապես կարևոր է այսօրվա աշխարհաքաղաքական և աշխարհատնտեսական բարդ իրավիճակում»։ Հանդիպման ընթացքում ձեռք բերված բոլոր պայմանավորվածությունների իրականացումն արագացնելու նպատակով Տոկաևն աշխատանքային խմբի ստեղծում է նախաձեռնել։
Կասիմ-Ժոմարտ Տոկաևն ասել է, որ Ֆրանսիան Ղազախստանի կարևոր գործընկերն է, նաև ընդգծել, որ այս տարի լրանում է երկու երկրների միջև ռազմավարական գործընկերության համաձայնագրի ստորագրման 15-ամյակը։ Երկրի ղեկավարը հավելել է, որ Ֆրանսիան Ղազախստանի խոշորագույն ներդրողների թվում է։
«Այս տարվա 8 ամիսների ընթացքում մեր երկրների միջև ապրանքաշրջանառության ծավալն անցյալ տարվա համեմատ աճել է 21 տոկոսով և հասել 2,7 միլիարդ դոլարի։ Վերջին 15 տարիների ընթացքում Ֆրանսիայից Ղազախստան է ներգրավվել շուրջ 18,7 միլիարդ դոլարի ներդրումներ»,- ասել է Տոկաևը։
Ֆրանսիայի նախագահի այցի ընթացքում կողմերը պայմանավորվել են նաև հողմային էլեկտրակայանի համատեղ կառուցման և երկաթուղային տեխնիկայի պահպանման շուրջ, պայմանագրեր են ստորագրվել դաբաղի դեմ պատվաստանյութերի մատակարարման, ֆրանսիական գործակալության խմբի ստեղծման և Ղազախստանում ֆրանսիական դպրոցների բացման վերաբերյալ։
