15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Տարածաշրջանը մոտ է վճռական որոշում կայացնելուն․ Աբդոլլահիանը՝ Թուրքիայի ԱԳ նախարարին
Քաղաքականություն
01.11.2023 | 18:23
Իրանի արտաքին գործերի նախարար Հոսեյն Ամիր Աբդոլլահիանը հայտարարել է, որ տարածաշրջանը շատ մոտ է Պաղեստինի իրավիճակի վերաբերյալ մեծ և վճռական որոշում կայացնելուն, եթե Իսրայելի ագրեսիաները շարունակվեն։ Mehr գործակալության փոխանցմամբ՝ Աբդոլլահիանը նման հայտարարություն է արել Անկարայում Թուրքիայի ԱԳ նախարար Հաքան Ֆիդանի հետ մամուլի ասուլիսում տեղի ունեցած բանակցություններից հետո։
Նա նշել է, որ Իրանը շարունակում է տարածաշրջանում իր դաշնակիցների և ընկերների հետ խորհրդակցելու ջանքերը՝ կանխելու Գազայի պատերազմի շրջանակների ընդլայնումը։ Իրանցի բարձրաստիճան դիվանագետը հավելել է, որ Իրանի նախագահն առաջարկել է հանդիպում անցկացնել իսլամական և արաբական երկրների ղեկավարների մասնակցությամբ Պաղեստինի հարցով։
«Եթե խաղաղ բնակչության դեմ ցեղասպանությունն ու պատերազմական հանցագործությունները չդադարեցվեն, ապա տարածաշրջանը շատ մոտ կլինի մեծ և վճռական որոշում կայացնելուն»,- ընդգծել է նա՝ հավելելով, որ այդ դեպքում Իսրայելն ու նրա կողմնակիցները պատասխանատվություն կկրեն պատերազմի շրջանակների ընդլայնման համար։
Աբդոլլահիանը կոչ է արել բոյկոտել իսրայելական ռեժիմի արտադրանքը՝ հավելելով. «Մենք աջակցում ենք ցանկացած քաղաքական նախաձեռնության, որը կանխում է պատերազմի տարածումը և երաշխավորում Պաղեստինի ժողովրդի իրական իրավունքները»:
Նա նաև հայտնել է, որ Իրանի նախագահ Էբրահիմ Ռաիսին իր թուրք գործընկերոջ հրավերով մոտ ապագայում կայցելի Թուրքիա։
Անդրադառնալով Թեհրանի և Թուրքիայի երկկողմ հարաբերություններին՝ Իրանի ԱԳ նախարարն ասել է, որ երկու երկրները պայմանավորվել են ավելի արդյունավետ միջոցներ ձեռնարկել ընդհանուր սահմանների անվտանգության հարցում։
Նա նաև ողջունել է պաղեստինցիներին աջակցելու հարցում Թուրքիայի նախագահի և թուրք ժողովրդի դիրքորոշումը։
Էմմա Չոբանյան
