Ուկրաինայում հայտնել են, որ թուրքական «Բայրաքթար»-ներն այլևս «սահմանափակ պիտանի են» մարտի դաշտում

Թուրքական արտադրության Bayraktar TB2 անօդաչու թռչող սարքերը, որոնք, ինչպես հաղորդվում է, օգնում էին Ուկրաինային պատերազմում ավելի վաղ արձանագրված ռազմական հաջողություններում, այժմ սահմանափակ պիտանի են՝ ռուսական ուժերի կողմից իրենց հակաօդային պաշտպանությունն ուժեղացնելու պատճառով։ Այս մասին հայտնել է ուկրաինացի զինվորական պաշտոնյան, գրում է Defence News-ը։

Ուկրաինայի Գլխավոր հետախուզության վարչության հրամանատար, գնդապետ Վլադիմիր Վալիուխի գնահատականը հնչում է այն բանից հետո, երբ անօդաչու թռչող սարքերը շարունակում են առանցքային դեր խաղալ Ուկրաինայի պաշտպանական հաշվարկում, սակայն նոր մարտավարական սահմանափակումներ են մտել խաղի մեջ։

«TB2-ի համար ես չեմ ուզում օգտագործել անպիտան բառը, բայց դժվար է գտնել իրավիճակներ, որտեղ կարելի է դրանք օգտագործել»,- ասել է Վալիուխը։

Նրա խոսքով՝ Ուկրաինայի զինված ուժերի տարբեր ստորաբաժանումներ շարունակում են օգտագործել անօդաչու թռչող սարքեր, սակայն փոխվել են դրանց կիրառման հաճախականությունն ու դերը մարտի դաշտում։

«Մենք չափազանց երախտապարտ ենք TB2-ին, բայց պատերազմի սկզբում դրանք ավելի շատ են օգտագործվել և ավելի շատ հարվածներ են եղել»,- նշել է Վալիուխը:

Նա ասել է, որ թուրքական ԱԹՍ-ների օգտագործման հետ կապված դժվարություններ են առաջացել ռուսական հակաօդային պաշտպանության համակարգի հարմարեցման պատճառով։

Baykar ընկերությունն իր հերթին Defense News-ին ասել է, որ իր առաջատար արտադրանքի սահմանափակ օգտակարության մասին հաղորդագրություններին պետք է սկեպտիկ վերաբերվել։

«Սա բարդ միջավայր է գործելու համար, քանի որ Ռուսաստանը միջին և ավելի մեծ հեռահարության հարյուրավոր հակաօդային պաշտպանության համակարգեր է տեղակայել ուկրաինական ճակատում»,- պարզաբանել է «Բայքարի» գործադիր տնօրեն Հալուք Բայրաքթարը:

Նա նշել է, որ ներկայում ԱԹՍ-ները հիմնականում օգտագործվում են ամենօրյա թիրախային թռիչքների համար։

Էմմա Չոբանյան