07.10.2026 | 13:32
Դելին ու Երևանը քննարկում են Հայաստանում Pinaka Mk-II-ի արտադրության և հավաքման հնարավորությունը․ հնդկական ԶԼՄ
«Աթաթուրք» սերիալի հեռարձարկումը չեղարկելու համար Թուրքիայում ցանկանում են պատժամիջոցներ կիրառել Disney+-ի դեմ
Քաղաքականություն
11.10.2023 | 23:30
Թուրքիայի խորհրդարանի թվային լրատվամիջոցների հանձնաժողովը կքննարկի Disney+-ի դեմ պատժամիջոցների շրջանակում լիցենզիայի չեղարկումը՝ քննադատելով հարթակի որոշումը՝ չհեռարձակել «Աթաթուրք» հեռուստասերիալն այս շաբաթվա վերջին, գրում է Turkish Minute-ը։
Սերիալը, որը պետք է հեռարձակվեր Թուրքիայի Հանրապետության ստեղծման հարյուրամյակին, պատմում է ժամանակակից Թուրքիայի հիմնադիր Մուսթաֆա Քեմալ Աթաթուրքի մասին։
Հանձնաժողովի նախագահ, իշխող «Արդարություն և զարգացում» կուսակցության պատգամավոր Հուսեյն Յայմանն ասել է, որ հանդիպումը, որի ընթացքում նրանք կքննարկեն Disney-ի որոշման հետ կապված պատժամիջոցները, նախատեսված է հոկտեմբերի 12-ին։ Նա նշել է, որ իրենք կքննարկեն այնպիսի պատժամիջոցներ, ինչպիսիք են լիցենզիայի չեղարկումը, նկատողությունը, տուգանքը և գովազդի արգելքը՝ հավելելով, որ հույս ունեն միաձայն ընդունել նկատողության մասին որոշումը։
«Մենք բացարձակապես չենք ընդունում Disney+-ի որոշումը, մենք այն ճիշտ չենք գտնում: Ինչպես նախկինում ասել եմ՝ անհրաժեշտության դեպքում մենք կառաջարկենք չեղարկել լիցենզիան»,- ասել է պատգամավորը։
Նա նաև նշել է, որ Disney+-ի ներկայացուցիչներին հնարավորություն կտան ելույթ ունենալ՝ հրավիրելով նրանց խորհրդարան և հետաքրքրվելով իրենց որոշման պատճառներով։
Հիշեցնենք, որ ամիսներ առաջ սերիալի ցուցադրման չեղարկումը Թուրքիայում մեծ աղմուկ էր բարձրացրել։ Ըստ թուրքական կողմի՝ Disney+-ն ԱՄՆ-ի հայկական լոբբիի ճնշման պատճառով չեղարկել է իր իսկ կողմից նկարահանված «Աթաթուրք» սերիալի ցուցադրությունը։ Սերիալը, որն այժմ վերածվելու է գեղարվեստական ֆիլմի, նախատեսվում է ցուցադրել բացառապես թուրքական կինոթատրոններում նոյեմբերի 3-ին։
Էմմա Չոբանյան
