21.11.2024 | 21:45
Պուտինը մեկնաբանել է հեռահար զենքի օգտագործման հնարավորությունը
«Վստահաբար» 50+1 տոկոս հավաքելուց մինչև՝ «նման բան չենք ասել»․ Ավինյանը` ընտրություններից առաջ և հետո. ԵզրաԿԱՑՈւԹՅՈւՆ․ ՏԵՍԱՆՅՈՒԹ
Քաղաքականություն
10.10.2023 | 18:49
Երևանի ավագանու ընտրություններում «Քաղաքացիական պայմանագիր» կուսակցության ցուցակը գլխավորող Տիգրան Ավինյանն այսօր 32 կողմ ձայնով ընտրվեց քաղաքապետ։ Թեև սեպտեմբերի 17-ին ՔՊ-ն ամենաշատ քվեներն էր ստացել՝ 75,494 կամ 32,57%, միևնույն է՝ չէր կարող միաձայն քաղաքապետ ընտրվել, քանի որ չէր հաղթահարել անհրաժեշտ 50 տոկոսի շեմը։ Քաղաքապետ պիտի ընտրեր ավագանին՝ իր կազմից։ Երեք կուսակցություններ՝ ՔՊ-ն, «Հանրապետություն»-ը և «Հանրային ձայն»-ը, մասնակցելով ավագանու անդրանիկ նիստին, քվորում ապահովեցին և նիստը կայացավ։ Եվ քանի որ առաջադրված միակ թեկնածուն Տիգրան Ավինյանն էր, 32 ձայնը բավարար էր, որպեսզի նա քաղաքապետ ընտրվի։ Դեմ քվեարկեցին «Հանրային ձայն» կուսակցության՝ նիստին ներկա 5 անդամները, որոնք կալանքի տակ գտնվող կուսակիցների նկարներով շապիկներով էին։ «Հանրապետություն» կուսակցության ցուցակը գլխավորող Արտակ Զեյնալյանն էլ չպատասխանեց Factor TV-ի հարցին, թե ինչու կուսակցությունն իր թեկնածությունը չառաջադրեց։
Արդեն ընտրությունից հետո ՔՊ-ն և «Հանրապետություն»-ը համագործակցության հուշագիր կնքեցին, իսկ Տիգրան Ավինյանը հայտարարեց, որ Երևանի կառավարումն իրենց խմբակցությունները միասին են իրականացնելու, իսկ նշանակումները՝ համաձայնեցված։
Նշենք նաև, որ նախկին քաղաքապետ Հայկի Մարությանի գլխավորած «Ազգային առաջընթաց» կուսակցությունն ու Անդրանիկ Թևանյանի գլխավորած «Մայր Հայաստան» դաշինքը բոյկոտել էին նիստը։
Ընտրություններից առաջ՝ քարոզարշավի ժամանակ, Տիգրան Ավինյանը Factor TV-ի հարցին ի պատասխան ասել էր՝ «Մենք ակնհայտորեն այս ընտրություններում հաղթանակ ենք տոնելու»։
Այսօր նրան հիշեցրինք իր այդ հայտարարության մասին և հետաքրքրվեցինք՝ ընտրություններից հետո քաղաքական թիմը վերլուծե՞լ է, թե ինչու «չտոնեց այդ հաղթանակը»։ Տիգրան Ավինյանը, սակայն, հերքեց ինքն իրեն՝ նշելով, որ այդպիսի բան չի ասել։
«Մենք նման բան երբևէ չենք ասել»,- ասաց Ավինյանը։
Այդուհանդերձ, քարոզարշավի երկրորդ օրը նաև Azatutyun.am-ին տված հարցազրույցում, երբ հարցազրուցավարը հետաքրքրվել էր՝ արդյո՞ք ՔՊ-ի ակնկալիքը կամ հաշվարկը 50 տոկոսից ավելի քվեն է, Ավինյանը պատասխանել էր․ «Այո, վստահաբար»։
Մանրամասները՝ տեսանյութում։
Արփի Հակոբյան
