ԵԱՀԿ գործող նախագահը ԼՂ հայերին անհապաղ մարդասիրական աջակցության և հումանիտար ճգնաժամի պայմաններում միջազգային ներգրավվածության կոչ է անում

ԵԱՀԿ գործող նախագահ, Հյուսիսային Մակեդոնիայի արտաքին գործերի նախարար Բուջար Օսմանին, լուրջ մտահոգություններ հայտնելով Լեռնային Ղարաբաղի շուրջ ստեղծված իրավիճակի կապակցությամբ, կոչ է անում մեծացնել միջազգային աջակցությունն ու մարդասիրական օգնությունը Հայաստանի Հանրապետությունում ապաստան գտած ավելի քան 100,000 Լեռնային Ղարաբաղից հայերին։ Մարդասիրական կարիքները պետք է մնան գլխավոր առաջնահերթությունը, և միջազգային դոնոր հանրությունը պետք է շարունակի ակտիվորեն համերաշխություն ցուցաբերել ու կիսել պատասխանատվությունը Հայաստանին աջակցելու համար, քանի որ ՀՀ կառավարությունն արձագանքում է այս զարգացող մարդասիրական ճգնաժամին:

«ԵԱՀԿ գործող նախագահ Օսմանին ի գիտություն է ընդունել հոկտեմբերի 1-ին ՄԱԿ-ի ներկայացուցիչների այցը Ստեփանակերտ և կարծում է, որ միջազգային հանրության շարունակական ներգրավվածությունը կնպաստի տեղում իրավիճակի կայունացմանը և կայուն խաղաղությանն ուղղված ջանքերին:

Տեղում միջազգային ներգրավվածության վերաբերյալ քննարկումները պետք է շարունակվեն, քանի որ անկախ միջազգային դիտորդական առաքելությունը վստահություն կբերի նրանց, ովքեր ցանկանում են վերադառնալ:

ԵԱՀԿ գործող նախագահ Օսմանին նշում է Ադրբեջանի հրապարակային հայտարարությունները հայ բնակչության ինտեգրման և տեղահանված բնակչության վերադարձի հեռանկարների վերաբերյալ։ Ղարաբաղի հայերի իրավունքների և անվտանգության պաշտպանությունը՝ ԵԱՀԿ-ի իր պարտավորություններին համապատասխան, Ադրբեջանի պարտականությունն է։

Վեճերը լուծելու համար դիվանագիտական բանակցությունների ընթացքում ուժի կիրառումը միշտ անընդունելի է և խոչընդոտում է արժանապատիվ և ընդգրկուն խաղաղության հեռանկարներին։

Գործող նախագահ Օսմանին աջակցում է երկրների միջև խաղաղության պայմանագրին ուղղված քաղաքական գործընթացների շարունակմանը։

ԵԱՀԿ-ն և նրա համապատասխան կառույցները, իրենց մանդատի շրջանակներում, պատրաստ են իրենց ներդրումն ունենալ այս գործընթացում՝ կազմակերպության արժեքներին և պարտավորություններին համահունչ՝ տարածաշրջանում արդար, կայուն, արժանապատիվ և ներառական խաղաղության հասնելու համար»,- ասվում է հայտարարությունում: