13.01.2025 | 13:31
Պենտագոնի ղեկավարը խորհուրդ է տվել ԱՄՆ պաշտպանական ծախսերն ավելացնել ավելի քան 50 միլիարդ դոլարով
Շառլ Միշելը մինչև հոկտեմբերի վերջ Փաշինյանին և Ալիևին Բրյուսելում հանդիպման կհրավիրի
Քաղաքականություն
05.10.2023 | 21:59
ԵՄ խորհրդի նախագահ Շառլ Միշելը Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին հրավիրել է մինչև հոկտեմբերի վերջ հանդիպել Բրյուսելում։ Այս մասին Միշելը հայտնել է Գրանադայում լրագրողների հետ զրույցում, գրում է Reuters-ը։
«Մենք հավատում ենք դիվանագիտությանը: Մենք հավատում ենք քաղաքական երկխոսությանը»,- ասել է Միշելը։
Հիշեցնենք՝ Գրանադայում, որտեղ անցկացվում է Եվրոպական քաղաքական համայնքի գագաթնաժողովը, նախատեսվում էր Նիկոլ Փաշինյանի և Իլհամ Ալիևի հանդիպումը ԵՄ խորհրդի, Ֆրանսիայի և Գերմանիայի ղեկավարների մասնակցությամբ։ Բաքուն, սակայն, հանդիպումից մեկ օր առաջ հրաժարվել է բանակցություններին մասնակցությունից։
Հրապարակման մեջ ասվում է, որ գագաթնաժողովում առաջնորդները նաև խոստացել են աջակցել Հայաստանին, քանի որ այն պայքարում է անցյալ ամիս ադրբեջանական ռազմական գործողության հետևանքների հետ, որը հանգեցրեց Լեռնային Ղարաբաղից հայ բնակչության բռնի տեղահանման։
ԵՄ շատ առաջնորդներ դատապարտել են ադրբեջանական ռազմական գործողությունները, իսկ որոշ կառավարություններ կոչ են արել դաշինքին կոշտ միջոցներ ձեռնարկել Բաքվի դեմ, որը պնդում է, որ նա օրինական գործողություններ է ձեռնարկել իր «ինքնիշխան տարածքի մի մասի նկատմամբ վերահսկողությունը վերականգնելու համար»:
Հինգշաբթի էլ Եվրախորհրդարանը բանաձև է ընդունել, որում Բաքվին մեղադրել է «էթնիկ զտումների» մեջ և կոչ է անում ԵՄ-ին՝ պատժամիջոցներ կիրառել Լեռնային Ղարաբաղում հրադադարի խախտման և մարդու իրավունքների խախտման համար պատասխանատու ադրբեջանցի պաշտոնյաների նկատմամբ։
