11.08.2026 | 20:19
Միայն 4 օրում պարեկները վարորդների կողմից բեռների փոխադրման կանոնների խախտման 90 դեպք են արձանագրել
ՀՀ ԱԳՆ ղեկավարը շնորհավորական ուղերձ է հղել Արցախի Հանրապետության ԱԳՆ 25-ամյակի կապակցությամբ
20.07.2018 | 21:45
ՀՀ արտաքին գործերի նախարար Զոհրաբ Մնացականյանը Արցախի Հանրապետության արտաքին գործերի նախարար Մասիս Մայիլյանին շնորհավորական ուղերձ է հղել Արցախի արտաքին քաղաքական գերատեսչության հիմնադրման 25-ամյակի կապակցությամբ։
Շնորհավորական ուղերձում, մասնավորապես, նշված է․
«Մոտ երեք տասնամյակ առաջ համայն հայությունը միահամուռ կերպով ոտքի կանգնեց՝ սատարելու ինքնորոշման իրավունքի իրացման ուղին բռնած Արցախի ժողովրդին: Տպավորիչ է, որ չնայած պատերազմի ծանր հետևանքներին և տնտեսական շրջափակմամբ պայմանավորված մարտահրավերներին՝ Արցախի ժողովուրդն ապացուցեց իր վճռականությունը և կարողությունը՝ կառուցելու կենսունակ և ժողովրդավարական արժեքների վրա հիմնված պետություն՝ կյանքի կոչելով պայքարի գաղափարախոսների՝ հզոր և ինքնիշխան Արցախ կերտելու երազանքը։
Այս տարիների ընթացքում արցախահայությունը ստեղծել է կայուն պետականություն՝ իրեն բնորոշ բոլոր հատկանիշներով, հասարակության, կանանց և երիտասարդների ակտիվ ներգրավմամբ հաստատել պետական գործուն կառույցներ, որոնցից է նաև արդեն քառորդդարյա հոբելյանը նշող Արցախի արտաքին գործերի նախարարությունը։
Ի հեճուկս բոլոր սահմանափակումների, ճնշումների և մարտահրավերների՝ Արցախի արտաքին գործերի նախարարությունն իր անձնակազմի ամենօրյա նվիրյալ աշխատանքի շնորհիվ հետևողականորեն կրում է իր կարևոր առաքելությունը՝ ուղղված Արցախի միջազգային ճանաչմանը, միջազգային հարթակում արցախահայության ձայնը լսելի դարձնելուն և երկրի անվտանգության ամրապնդմանը։
Մեր երկու գերատեսչությունների միջև հաստատված սերտ համագործակցությունը բազմիցս ապացուցել է իր արդյունավետությունը միջազգային հարթակում արցախահայության շահերի պատշաճ ներկայացման առումով։
Եվս մեկ անգամ շնորհավորում եմ Ձեզ այս հոբելյանի առիթով և ցանկանում հավակնոտ ծրագրեր ու ապագային միտված առաջադեմ նախագծեր՝ ի բարօրություն ողջ արցախահայության»։
