Ընտրական օրենսգրքի խորհրդարանական քննարկումներում հակասությունները սրվում են. ՏԵՍԱՆՅՈՒԹ

«Եթե ինձ հնարավորություն տրվեր ընտրություն կատարելու երեք մոդելների միջև, միանշանակ Դաշնակցության մոդելն ամենաժողովրդավարականն է»,- ԸՕ բարեփոխումներին նվիրված խորհրդարանական այսօրվա քննարկմանն ասել է ՀՀԿ գործադիր մարմնի անդամ Դավիթ Հարությունյանը։

Դաշնակցությունն այսօր խորհրդարանում պնդում էր իր տեսակետը, ըստ որի՝ խորհրդարանական ընտրությունները պետք է անցնեն ամբողջ երկրի համար բաց ռեյտինգային միասնական ցուցակով, «Ելքն» առաջարկում է փակ ցուցակ, որտեղ բոլոր թեկնածուների տեղերը հաստատուն են և առանձին-առանձին ոչ մեկը չի քվեարկվում։

Դավիթ Հարությունյանը սա բացատրում է նրանով, որ «Ելքը» մարզերում գրասենյակ չունի, ուստի ընդդիմանում է Դաշնակցության առաջարկին։ «Ինչու՞ չենք ունեցել ֆիզիկապես գործող գրասենյակներ։ Որովհետեւ Հայաստանում եղել է ահաբեկչության մթնոլորտ, տեռորի են ենթարկել բիզնեսին, էն մարդկանց, որոնք կարող են կուսակցություններին փող տալ, մարդիկ վախեցել են փող տալ, մարդիկ վախեցել են անվճար անգամ իրենց գրասենյակի տարածքը տան»,- հակադարձում է «Ելք» խմբակցության անդամ Էդմոն Մարուքյանը։

Նա տեղեկացնում է, որ մարզերում Հանրապետականի այսօր ունեցած գրասենյակներն այդ կուսակցության սեփականությունն են։ Այսինքն, իշխանությունը ծառայեցրել են ոչ թե գրասենյակներ վարձակալելու համար, այլ՝ գնելու։ «Որեւէ մեկը հարցրե՞լ է ոնց է ՀՀԿ-ն էդքան սեփական գույք ձեռք բերել տարբեր քաղաքներում ու մարզերում գրասենյակների անվան տակ ծառայեցնելու համար։ Դա ո՞նց ա եղել։ Էդ ո՞նց եղավ, որ մենք չունենք»,- տարակուսում է պատգամավորը։

Նա նշում է, որ համապետական ընտրություններում Հանրապետականի մեկնարկային դիրքերը, գոնե գույքային իմաստով, «Ելքի» կուսակցությունների օգտին չեն։ «Հավասար ընտրություններ կարո՞ղ են լինել, երբ որ մեկն ունի հազար սեփական գրասենյակ, եսիմ քանի միլիոն դոլար հայտարարագրված փող, մյուսն ունի չորս գրասենյակ»,- ասում է պարոն Մարուքյանը։

Մարզերում գրասենյակների պակաս չունի նաև «Ծառուկյան» դաշինքը։ Այն առաջարկում է, որպեսզի ընտրությունները անցկացվեն փակ ցուցակով, բայց մարզերի ներկայացուցիչների և կանանց թիվը ցուցակում լինի քվոտավորված։ «Մենք գտնում ենք, որ փակ համամասնական ընտրակարգը շատ կարևոր է, որպեսզի ռեստարտ արվի ամբողջ ընտրակեղծիքների հոգեբանությունը»,- շեշտում է դաշինքի ներկայացուցիչ Սերգեյ Բագրատյանը։

Ի դեպ, պատգամավորն անդրադարձավ նաև երեք օր առաջ Դանիել Իոաննիսյանի հասցեին Ազգային Ժողովի փոխնախագահ Արփինե Հովհաննիսյանի արած վիրավորական արտահայտությանը։ Սերգեյ Բագրատյանը հույս ունի, որ տիկին Հովհաննիսյանը կընդունի իր սխալը և դա չի վերագրի իրավիճակին։

«Երբ որ այն միջավայրը, որում դու աշխատում ես, ազնվության խնդիր ունի, իհարկե, դժվար է այնտեղ աշխատելը»,- ասում է պարոն Բագրատյանը։ Հանրապետական Դավիթ Հարությունյանն արդեն նկատել է, որ տիկին Հովհաննիսյանը ներողություն է խնդրել իր արտահայտության համար, բայց զարմացած է, որ Դանիել Իոաննիսյանը դա համարել է իր անձին ուղղված վիրավորանք։

«Եթե ինչ-որ մեկը անձնական է դա ընկալել, շատ ավելի բարեկիրթ է ներողություն խնդրելը»,- չի նահանջում Դավիթ Հարությունյանը։ Ի դեպ, նա այսօր տեղեկացրեց, որ այս պահին Հանրապետականը դեռ պաշտոնական որոշում չունի Երևանի ավագանու ընտրություններին մասնակցել-չմասնակցելու հարցի շուրջ։

Մհեր Արշակյան