«Ռուսաստանը ռուսների՛ համար, ո՛չ թե «խաչերի». ռուս ազգայնականների երթը՝ Տյումենում․ ՏԵՍԱՆՅՈՒԹ

Ռուսաստանում ֆաշիստական խմբավորումները սկսել են թիրախավորել հայերին։ Օրերս Տյումեն քաղաքում ռուս ծայրահեղ ազգայնականների մի խումբ հակահայկական լոզունգներով երթ է կազմակերպել դեպի Տյումենի մարզի հայերի միության շենքը։

«Ռուսաստանը ռուսների՛ համար է, ո՛չ թե խաչերի» ․ երթն ուղեկցվել է այսպիսի վանկարկումներով։ Ռուս ազգայնականները «խաչեր», «խաչիկ» կոչում են ո՛չ միայն հայերին, այլև այլազգի քրիստոնյաներին։ Ազգայնականների այս հավաքը անցկացվել է Տյումենի մարզի հայերի միության շենքի դիմաց, ինչը վկայում է, որ «Ռուսաստանը ռուսների համար է, ոչ թե խաչերի» վանկարկումը այս պարագայում օգտագործում են հայերի դեմ։ Ֆաշիստական այս երթին իրավապահները չեն միջամտել։

Տեսանյութը՝ այստեղ։

Թեև վերջին տարիներին Ռուսաստանում հայտարարում են, թե պայքարում են ֆաշիստական դրսևորումների դեմ, սակայն ակնհայտ է, որ եթե ռուս իրավապահները թույլատրում են Տյումենի հայերի միության շենքի մոտ այսպիսի հավաք անցկացնել, նշանակում է, այն արտոնված է Ռուսաստանի իշխանության կողմից։

Ուշագրավ է այն, որ ֆաշիստական այս երթը տեղի է ունենում Ռուսաստանում, որը «դենացիֆիկացիայի» նպատակով արյունալի պատերազմ է սանձազերծել Ուկրաինայի դեմ։

Հատկանշական է նաև, որ ազգայնականները բողոքի ակցիայի վայր են ընտրել հենց Տյումենի մարզի Հայերի միության շենքը։ Մեր տեղեկություններով,  միության նախագահ Աբրահամ Հովեյանը Հայաստանի վարչապետի հետ մտերիմ հարաբերություններ ունի։ Վերջին շրջանում հայ-ռուսական լարված հարաբերությունների ֆոնին  Փաշինյանն օրերս հրապարակավ ահազանգել էր Հայաստանի անկախությանը և ինքնիշխանությանը սպառնացող վտանգների մասին։ Նա դիմել էր սպառնալիք հանդիսացող պետությանը, պահանջելով, որ նա հարգի Հայաստանի ինքնիշխանությունը և անկախությունը։ Ակնհայտ է, որ նրա ելույթն ուղղված էր Ռուսաստանի իշխանություններին։

Ռոբերտ Անանյան