Անձի նույնականացումից հետո հնարավոր կլինի վերականգնել նրանց փաստաթղթերը. Արմեն Ղազարյան. ՏԵՍԱՆՅՈՒԹ

Հաշվառված 55240 անձանցից 26575-ը արական սեռի է, իսկ 28670-ը՝ իգական, հաշվառվածների թվում ունեցել ենք 1172 հաշմանդամություն ունեցող անձ և 133 հղի կին: Այս մասին «Հումանիտար կենտրոն»-ի կողմից ցուցաբերվող աջակցության աշխատանքների ընթացքը ներկայացնելով՝ մամուլի ասուլիսում հայտնեց ՆԳՆ միգրացիայի և քաղաքացիության ծառայության պետ Արմեն Ղազարյանը:

Նրա խոսքով՝ ամենամեծ թվով քաղաքացիներ բռնի տեղահանվել են Ստեփանակերտից՝ 27 408 անձ, այնուհետև Մարտակերտի շրջանը՝ 10 հազարից ավելի, Ասկերանի շրջանը՝ 7500-ից ավելի, շուրջ 7000 Մարտունու շրջանը և այսպես շարունակ:

«Հաշվառումն իրականացվում է 2 փուլով, առաջինը՝ անձնական տվյալների հավաքագրումն ու նույնականացումն է: Սա շատ էական գործընթաց է՝ հետագայում բոլոր տիպի աջակցությունները, իրականացող ծրագրերը թիրախային դարձնելու համար: Առաջին իսկ օրվանից Կոռնիձորի հումանիտար կայանում իրականացվել է հաշվառվում: Սակայն հետագայում, երբ մարդկանց հոսքը մեծացել է, Կոռնիձորի կայանի նպատակայնությունը փոխվել է, և հաշվառման գործընթացն այնտեղ դադարեցվել է: Առաջին օրվանից հաշվառում իրականացվում է Գորիսում, չի դադարեցվել: Վայքում ևս բացվել է համապատասխան հումանիտար կայանը»,-ասաց Ղազարյանը:

Նա տեղեկացրեց նաև, որ սեպտեմբերի 27-ից արդեն irazekum.am կայքում ևս հրապարակված է բոլոր մարզերում հումանիտար կենտրոնների ցանկը: Եվ ԼՂ-ից տեղահանված բոլոր հայրենակիցները կարող են հաշվառվել այն հումանիտար կայաններում:

Ղազարյանն ընդգծեց, որ սոցիալական բոլոր հետագա ծրագրերը պետք է բխեն անձանց նույնականացումից և կարիքներից: Հաշվառման գործընթացում իրականացվում է կարիքի նախնական գնահատում:

Նա նաև ընդգծեց, որ անձի նույնականացումից հետո հնարավոր կլինի վերականգնել նրանց փաստաթղթերը։

Մանրամասները՝ տեսանյութում։