Քաղաքականություն
28.09.2023 | 15:15
ԱՄՆ-ը հերթական անգամ ուժեղացնում է պատժամիջոցները օտարերկրյա կազմակերպությունների դեմ՝ այս անգամ թիրախավորելով թուրքական ընկերություններին և անհատներին՝ Ռուսաստանի դեմ պատժամիջոցները խախտելու հարցում նրանց ենթադրյալ մասնակցության համար: Այս մասին հայտարարել է ԱՄՆ Ֆինանսների նախարարության արտաքին ակտիվների վերահսկման գրասենյակը (OFAC), գրում է Gercek news-ը։
Պատժամիջոցներ են կիրառվել հինգ ընկերությունների և երկու անձանց նկատմամբ, որոնք մեղադրվում են Իրանի անօդաչու թռչող սարքերի ծրագրին օժանդակելու մեջ:
Այս կազմակերպությունների և անհատների դեմ հիմնական մեղադրանքը նրանց դերն է կարևոր բաղադրիչների, մասնավորապես՝ շարժիչների մատակարարման գործում, որոնք օգտագործվում են Իրանի «Շահեդ» անօդաչու թռչող սարքերի կառուցման մեջ:
Պատժամիջոցների արդյունքում ԱՄՆ-ում սառեցվելու են բոլոր ակտիվները, որոնք պատկանում են նշված անձանց և կազմակերպություններին։
2023 թվականի սեպտեմբերի 14-ին ԱՄՆ Ֆինանսների նախարարությունը պատժամիջոցներ էր սահմանել ավելի քան 150 անհատների և ընկերությունների նկատմամբ տարբեր երկրներից, այդ թվում՝ Թուրքիայից՝ Ռուսաստանի դեմ պատժամիջոցները խախտող գործողություններում ենթադրյալ մասնակցության համար։
Էմմա Չոբանյան
