30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
ԵՄ-ն 5 մլն եվրո օգնություն է տրամադրում ԼՂ-ի բնակիչներին
Քաղաքականություն
26.09.2023 | 17:39
ԵՄ-ն ավելացնում է իր մարդասիրական ֆինանսավորումը 5 միլիոն եվրոյով՝ ի պատասխան Լեռնային Ղարաբաղի ճգնաժամի հետևանքով աճող կարիքների։ Այս մասին հայտնում է Եվրահանձնաժողովը։
«Հակամարտության էսկալացիան և դրան հաջորդած հրադադարը, հավանաբար, կառաջացնեն Լեռնային Ղարաբաղից մարդկանց զանգվածային արտագաղթի Հայաստան․ շուրջ 13 500 փախստական արդեն հատել է սահմանը: Միևնույն ժամանակ, Լեռնային Ղարաբաղի անկլավում առկա է պարենամթերքի մեծ պակաս և էլեկտրականության և ջրի հասանելիության բացակայություն»,-ասվում է հայտարարության մեջ։
Նշվում է, որ 5 միլիոն եվրո մարդասիրական ֆինանսավորումը ներառում է 500 000 եվրո շտապ օգնություն, որը հայտարարվել է անցյալ շաբաթ և 4,5 միլիոն եվրո նոր ֆինանսավորում։ Այն ենթադրում է աջակցություն Լեռնային Ղարաբաղից Հայաստան տեղահանվածներին։ Այս օգնությունը տրամադրվելու է Հայաստանում Մ գործընկերների կողմից՝ թիրախում ունենալով մոտ 25 000 մարդու։ Առաջնահերթությունը դրամական օգնության, ապաստանի, պարենային ապահովության և ապրուստի միջոցների տրամադրումն է: Նաև աջակցություն է տրվելու Լեռնային Ղարաբաղի ներսում խոցելի մարդկանց։ Այդ օգնությունն ուղղվելու է ԵՄ մարդասիրական գործընկեր Կարմիր խաչի միջազգային կոմիտեի միջոցով և նպատակ ունի աջակցել մոտ 60 000 մարդու սննդի, առողջապահության, կացարանի և նյութատեխնիկական ապահովմամբ:
«Մենք պետք է պատրաստ լինենք աջակցելու այն հազարավորներին, որոնք որոշել են փախչել Լեռնային Ղարաբաղից, քանի որ գալիք ձմեռը, ամենայն հավանականությամբ, փախստականներին կկանգնեցնի լրացուցիչ մարտահրավերների առաջ: ԵՄ-ն կտրուկ ընդլայնում է իր մարդասիրական օգնությունը տարածաշրջանում, որպեսզի շտապ օգնություն տրամադրի կարիքավոր մարդկանց, ինչպես Լեռնային Ղարաբաղի անկլավում, այնպես էլ այժմ Հայաստանում տեղահանված մարդկանց: ԵՄ-ն հանձնառու է համակարգել մարդասիրական ջանքերը տեղում՝ օգնելու այս հակամարտությունից տուժած մարդկանց»,-ասել է ԵՄ Ճգնաժամային կառավարման հանձնակատար Յանեզ Լենարչիչը։
ԵՄ-ն նաև հումանիտար փորձագետ է գործուղղում տարածաշրջան, որը կաշխատի տեղում մարդասիրական գործընկերների հետ՝ ճգնաժամին արագ արձագանքելու համար:
