Գերմանիան պատրաստ է առաջատար ռազմական դեր խաղալ Բալթյան երկրներում

Գերմանիան պատրաստ է առաջատար դեր խաղալ ՆԱՏՕ-ի արևելյան թևում գտնվող Բալթյան տարածաշրջանի անվտանգության ապահովման գործում։ Այս մասին Լատվիայի պաշտպանության նորանշանակ նախարար Անդրիս Սպրուդսի հետ համատեղ մամուլի ասուլիսում հայտարարել է Գերմանիայի պաշտպանության նախարար Բորիս Պիստորիուսը, գրում է DW-ի ռուսական ծառայությունը։

«Բալթյան տարածաշրջանը հատկապես խոցելի է, ուստի Գերմանիան ստանձնում է հատուկ պարտականություններ այստեղ՝ ցամաքում, ջրում և օդում։ Մենք պատասխանատու ենք այս տարածաշրջանի համար, որը մենք անվանում ենք արևելյան թև (ՆԱՏՕ): Մենք ձեզ հետ ենք։ Գերմանիան պատրաստ է առաջատար ռազմական դեր խաղալ Բալթյան երկրներում՝ ցամաքում, ծովում և օդում, մենք կատարում ենք մեր խոստումները»,- ասել է Պիստորիուսը։

Իր հերթին Անդրիս Սպրուդսը նշել է, որ Գերմանիայի պաշտպանության նախարարի հետ հանդիպման թեմաներից մեկը եղել է Ուկրաինային աջակցությունը։

«Գերմանիան կարևոր դաշնակից է Բալթյան տարածաշրջանում, որը վճռորոշ դեր է խաղում անվտանգության ամրապնդման գործում: 2024 թվականին Գերմանիան առաջին անգամ կաջակցի ՆԱՏՕ-ի օդային անվտանգության առաքելության իրականացմանը Լատվիայից: Մենք նաև երախտապարտ կլինենք Գերմանիայի աջակցության համար Բալթյան երկրների հակաօդային պաշտպանության հետագա ամրապնդմանը»,- գրել է նախարարը X-ում։

Սեպտեմբերի 10-ին Բեռլինը նաև գրավոր ծանուցում է ուղարկել Եվրոպայում ՆԱՏՕ-ի ուժերի գլխավոր հրամանատարի տեղակալին՝ Բալթիկ ծովում ՆԱՏՕ-ի շտաբի ղեկավարությունը ստանձնելու հնարավորության համար։

Ավելի վաղ՝ հունիսի վերջին, Վիլնյուս կատարած այցի ժամանակ Բորիս Պիստորիուսն ասել էր, որ ՆԱՏՕ-ի արևելյան թևն ամրապնդելու համար Գերմանիան պատրաստ է երկարաժամկետ հիմունքներով Լիտվայում տեղակայել Բունդեսվերի լրացուցիչ 4,000 զինվորականի։