14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ձերբակալվել է Ստեփանավանի սոցիալական ծառայությունների տարածքային գործակալության 4 աշխատակից
Հասարակություն
19.07.2018 | 21:43
Ինչպես արդեն տեղեկացվել է՝ Լոռու մարզի դատախազության նախաձեռնությամբ
մարզի սոցիալական աջակցության ոլորտում բացահայտված դեպքերի կապակցությամբ
մարզային քննչական վարչությունում քննվող քրեական գործի նախաքննության
ընթացքում կատարված մեծածավալ քննչական և այլ դատավարական
գործողությունների արդյունքում ձեռք են բերվել առերևույթ չարաշահումների
մասին փաստական տվյալներ: Մասնավորապես պարզվել է, որ Ստեփանավանի
սոցիալական ծառայության տարածքային գործակալության թվով 5 աշխատակիցներ,
օգտագործելով իրենց պաշտոնեական դիրքը, սկսած 2007թ.-ից, տարբեր
ժամանակահատվածներում, մինչև 2018թ. հունիս ամիսը, առանց մի շարք
քաղաքացիների գիտության, Ստեփանավանի տարածքային գործակալության
համակարգչային բազայում կեղծ տեղեկություններ են մտցրել նրանց սոցիալապես
անապահովության վերաբերյալ և ապօրինի ձևակերպել ընտանեկան նպաստներ: Նրանք այդ գումարները նպաստառուների ցուցակներում հաշվառված նույն անձանց
հանձնելու պատրվակով, նրանց անունների դիմաց ստորագրելով, «Հայփոստ» ՓԲԸ
տվյալ տարածքներն սպասարկող բաժանմունքների փոստատարներից անձամբ ստացել և
այդ կերպ խարդախության եղանակով հափշտակել են առանձնապես խոշոր չափերի
գումար:
Քննության այս փուլի դրությամբ ձեռք բերված տվյալներն առերևույթ վկայում
են, որ 2007թ.-ից մինչև 2018թ. հունիս ամիսն ընկած ժամանակահատվածում
Ստեփանավանի տարածքային գործակալությունում ապօրինի հաշվառվել են
հարյուրավոր կեղծ նպաստառուներ: Նրանց անվամբ ձևակերպված նպաստի գումարները
տևական ժամանակահատվածում՝ յուրաքանչյուր ամիս «Հայփոստ» ՓԲԸ փոստային
բաժանմունքի աշխատակիցների միջոցով փոխանցվել են գործակալության
աշխատակիցներին:
Թեև նախաքննության սկզբնական փուլում ամբողջությամբ վերականգնվել էր
պետությանը պատճառված շուրջ 15 մլն ՀՀ դրամի չափով վնասը, սակայն արդեն իսկ
ակնհայտ է դարձել, որ վերը հիշատակված փաստական տվյալների առկայության
պայմաններում պետությանը պատճառված վնասի չափը զգալիորեն գերազանցում է
քրեական գործի հարուցման հիմքում դրված չափին: Քննությամբ ի հայտ եկող նոր
հանգամանքների բերումով, պետությանը պատճառված վնասի չափն անընդհատ աճի
միտում ունի, ինչը վերջնական կճշգրտվի և կներկայացվի քննության ավարտական
արդյունքներով:
2018թ. հուլիսի 19-ին ՀՀ քրեական օրենսգրքին 178-րդ հոդվածի 3-րդ մասի
1-ին կետով և 325-րդ հոդվածի 2-րդ մասով նախատեսված հանցավոր արարքները
կատարելու մեջ անմիջականորեն ծագած կասկածանքի հիման վրա ձերբակալվել են ՀՀ
Լոռու մարզպետարանի Ստեփանավանի սոցիալական ծառայությունների տարածքային
գործակալության թվով 4 աշխատակիցները:
Նախաքննությունը շարունակվում է: Ձեռնարկվում են անհրաժեշտ քննչական և այլ
դատավարական գործողություններ՝ կոռուպցիոն սխեմայում ներգրավված իրավասու
անձանց ամբողջական շրջանակը պարզելու, նրանց արարքին իրավական գնահատական
տալու, ինչպես նաև պետությանը պատճառված վերջնական վնասի չափը ճշտելու
ուղղությամբ:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է
անմեղ, քանի դեռ նրա մեղավորությունն ապացուցված չէ ՀՀ քրեական
դատավարության օրենսգրքով սահմանված կարգով` դատարանի` օրինական ուժի մեջ
մտած դատավճռով:
