30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Հավաքների ընթացքում ոստիկանների գործողությունների վերաբերյալ հաղորդումների առթիվ խոշտանգման հոդվածով 11 վարույթ է նախաձեռնվել
Հասարակություն
25.09.2023 | 18:08
Երևանում իրականացվող զանգվածային հավաքների ընթացքում ոստիկանության ծառայողների գործողությունների իրավաչափության առնչությամբ ստացված հաղորդումների հիման վրա Քննչական կոմիտեի տարածքային համապատասխան ստորաբաժանումներում նախաձեռնվել է ընդհանուր 11 քրեական վարույթ՝ ՀՀ քրեական օրենսգրքի 450-րդ հոդվածի 1-ին մասի հատկանիշներով։
Նշված քրեական վարույթների շրջանակներում տուժող է ճանաչվել 7 անձ, նրանց վերաբերյալ նշանակվել են դատաբժշկական փորձաքննություններ։ Քրեական վարույթներով նախաքննությունը շարունակվում է։ Factor.am-ի հարցմանն ի պատասխան՝ այս մասին հայտնում են Քննչական կոմիտեից:
Նշենք, որ Քրեական օրենսգրքի 450-րդ հոդվածի 1-ին մասով սահմանվում է խոշտանգման հանցակազմը (պաշտոնատար անձի կողմից կամ նրա դրդմամբ, կարգադրությամբ կամ գիտությամբ որևէ անձի դիտավորությամբ ֆիզիկական ուժեղ ցավ կամ հոգեկան ուժեղ տառապանք պատճառելը՝ այդ կամ երրորդ անձից տեղեկություն կամ խոստովանություն ստանալու նպատակով կամ այն արարքի համար պատժելու նպատակով, որն այդ կամ երրորդ անձը կատարել է կամ որի կատարման մեջ կասկածվում կամ մեղադրվում է, ինչպես նաև այդ կամ երրորդ անձին վախեցնելու կամ որևէ արարք կատարելուն կամ կատարումից ձեռնպահ մնալուն հարկադրելու նպատակով կամ ցանկացած բնույթի խտրականության վրա հիմնված ցանկացած պատճառով՝ պատժվում է ազատազրկմամբ՝ չորսից ութ տարի ժամկետով):
