Լևոն Քոչարյանին կալանավորելու միջնորդությունը մակագրվել է դատավոր Մասիս Մելքոնյանին

Քննչական կոմիտեն Հայաստանի երկրորդ նախագահ Ռոբերտ Քոչարյանի որդուն՝ Լևոն Քոչարյանին կալանավորելու միջնորդություն է ներկայացրել դատարան: Այն մակագրվել է դատավոր Մասիս Մելքոնյանին, Factor.am-ի հետ զրույցում ասաց Քոչարյանի պաշտպան Էրիկ Ալեքսանյանը: Այս պահին դեռևս նիստի օր և ժամ հայտնի չէ:

Նշենք, որ Մասիս Մելքոնյանն այն դատավորն է, որին մակագրվել էր նաև Քոչարյանի ձերբակալման դեմ նրա պաշտպանների բողոքը: Բողոքի քննության ընթացքում պաշտպանները նրան ինքնաբացարկի միջնորդություն էին ներկայացրել, որը դատավորը մերժվել էր: Դրանից հետո պաշտպանները հրաժարվել էին ձերբակալման դեմ բողոքից՝ պատճառաբանելով, որ Մասիս Մելքոնյանը քաղաքականացված է:

«Մասիս Մելքոնյանն ընդամենը 3 ամիս առաջ եղել է «Հանրապետություն» կուսակցութան խորհրդի անդամ և բազմիցս արել է քաղաքական հայտարարություններ, որոնք եղել են վերաբերելի ՀՀ երկրորդ նախագահ Ռոբերտ Քոչարյանին: Դատավոր Մասիս Մելքոնյանն ընդգծված քաղաքականացված է, և իր կողմից ինքնաբացարկ չհայտնելը մեզ մոտ առաջացրել են ողջամիտ կասկածներ: Մեզ համար առավել ընդունելի է բողոքի չքննարկումը, քան քաղաքականացված դատավորի կողմից այն քննարկելը»,- այս բովանդակությամբ հայտարարություն էին տարածել պաշտպանները:

Նշենք, որ այն դեպքում, երբ ձերբակալման դեմ բողոք է տարվում, ապա ներկայացվում է մեղադրյալին կալանավորելու միջնորդություն, բողոքն ու միջնորդությունը միասին են քննվում՝ նույն դատավորի վարույթում: Այս դեպքում, փաստորեն, ձերբակալման դեմ բողոքից պաշտպանները հրաժարվել են, և կալանավորման միջնորդությունը կարող էր մակագրվել այլ դատավորի, սակայն միջնորդությունը կրկին նույն դատավորին՝ Մելքոնյանին է մակագրվել:

Հիշեցնենք, որ Լևոն Քոչարյանը մեղադրվում է իշխանության ներկայացուցչի նկատմամբ բռնություն գործադրելու մեջ, մեղադրանքը չի ընդունում։ Նա հայտարարել է, որ պատրաստ է առերեսվել իր դեմ ցուցմունք տված ոստիկանների հետ, նաև պնդում է, որ ոստիկաններն են իր նկատմամբ բռնություն գործադրել, և ոչ թե ինքը՝ նրանց նկատմամբ: Նա հաղորդում է տվել իրեն խոշտանգելու վերաբերյալ, որի առթիվ ևս առկա է քրեական վարույթ:

Արաքս Մամուլյան