15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Կոռնիձորում հիմնված Հումանիտար կայանն այս պահին որևէ աշխատանք չի կատարում
22.09.2023 | 17:54
Կառավարությունն այսօր հաղորդագրություն է տարածել՝ հայտնելով, որ Սյունիքի մարզի Տեղ համայնքի Կոռնիձոր բնակավայրի դաշտային հատվածում օգոստոսի 29-ին հիմնված Հումանիտար կայանի աշխատանքը խիստ կարևորվում է և այդ նպատակով ՀՀ կառավարության պահուստային ֆոնդից կհատկացվի 15,911.7 հազ. դրամ ։
Կոռնիձորում գտնվող FactorTV-ի թղթակիցը հայտնում է, որ այս պահին այդ կայանում որևէ գործընթաց տեղի չի ունենում։
«Ըստ գործադիրի կողմից ընդունած որոշման՝ կայանի ներսում պետք է լինեն մի քանի համակարգիչ, որով պետք է մուտք գործող մարդկանց տվյալները գրանցեն, կարիքները գնահատեն և այլ գործողություններ իրականացնեն։ Այդ համակարգիչներն առկա են։ Սակայն ներսում որևէ աշխատակից չկա, այս պահին նախապատրաստական աշխատանք տեսանելի չէ, չկան նաև տեղահանված մարդիկ։ Այստեղ պարզապես ոստիկաններ են, որոնք հսկում են տարածքը»,- Կոռնիձորից փոխանցում է Factor TV-ի թղթակիցը։
Նշենք, որ Կառավարության տարածած հաղորդագրության համաձայն՝ հումանիտար ճամբարը ծառայում է որպես հարթակ, որի միջոցով հնարավոր է իրավապաշտպան կազմակերպություններին և համաշխարհային հանրությանը ներկայացնել ԼՂ-ում հումանիտար ճգնաժամի ողջ իսկությունը, կազմակերպել վերջիններիս այցերը և դեպքերի ընթացքի մասին տեղեկատվություն տրամադրել անմիջապես այն միջավայրից, որտեղ օգնության ցուցաբերման նպատակով կուտակված է հումանիտար բեռը։
