20.06.2026 | 06:31
ԱԱ-2026. Բրազիլացիները հաղթեցին խոշոր հաշվով. ՏԵՍԱՆՅՈՒԹ
ԵՄ հանձնաժողովը պատրաստվում է Ուկրաինային անդամակցության բանակցություններ առաջարկել
Քաղաքականություն
22.09.2023 | 17:01
Եվրահանձնաժողովը հաջորդ ամիս կարող է առաջարկով հանդես գալ Ուկրաինայի՝ Եվրամիությանն անդամակցելու շուրջ բանակցություններ սկսելու վերաբերյալ, իսկ ԵՄ անդամ երկրների ղեկավարները, ամենայն հավանականությամբ, այդ առաջարկը կքննարկեն դեկտեմբերին, հայտնում է Bloomberg-ը՝ հղում անելով սեփական աղբյուրներին։
«Սպասվում է, որ հաջորդ ամիս Եվրահանձնաժողովը հանձնարարական կներկայացնի՝ սկսելու ԵՄ-ին Ուկրաինայի անդամակցության երկարատև գործընթացը»,- ասվում է հրապարակման մեջ։
Գործակալության զրուցակիցները նշել են, որ Եվրահանձնաժողովը կարող է պնդել, որ «որպես միջանկյալ քայլեր»՝ Կիևը պետք է առաջընթաց գրանցի «որոշ առաջնահերթ ոլորտներում», մասնավորապես՝ կոռուպցիայի հետ կապված խնդիրները լուծելու համար։
Ըստ հրապարակման՝ հանձնարարականը ներկայացնելուց հետո ԵՄ առաջնորդները պետք է հաստատեն նախաձեռնությունը, իսկ Եվրահանձնաժողովի առաջարկի քննարկումը, ամենայն հավանականությամբ, տեղի կունենա դեկտեմբերին կայանալիք գագաթնաժողովում։
«Դրանից հետո Ուկրաինան կսկսի բարեփոխումներն ավարտելու և երկիրը ավելի քան 30 ոլորտներում ԵՄ օրենսդրությանը համապատասխանեցնելու երկարատև ընթացակարգը»,- գրում է գործակալությունը։
