Քաղաքականություն
22.09.2023 | 17:35
1980-ականներին Իրաքի հետ պատերազմի տարելիցի կապակցությամբ Իրանում անցկացված շքերթի ժամանակ ցուցադրվել է ռազմական տեխնիկա, այդ թվում՝ բալիստիկ և գերձայնային հրթիռներ, ինչպես նաև «աշխարհի ամենաերկար հեռահարությամբ» անօդաչու թռչող սարքը, գրում է Reuters-ը։
Խոսքը «Մոհաջեր», «Շահեդ» և «Արաշ» անօդաչու սարքերի մասին է։
Անցյալ ամիս Իրանը հայտարարել էր, որ կառուցել է կատարելագործված Mohajer-10 անօդաչու թռչող սարք՝ ավելի մեծ հեռահարությամբ և դիմացկունությամբ, ինչպես նաև ավելի մեծ ծանրաբեռնվածությամբ, անցած ամիս հաղորդել են իրանական լրատվամիջոցները: Դրա թռիչքի հեռահարությունը 2000 կմ է և կարող է թռչել մինչև 24 ժամ։ Օգտակար բեռը կարող է հասնել 300 կգ-ի, ինչը կրկնակի գերազանցում է Mohajer-6 անօդաչու թռչող սարքի կրողունակությունը։
ԱՄՆ պաշտոնյաներն Իրանին մեղադրում են Ուկրաինայի դեմ պատերազմի համար Ռուսաստանին Mohajer-6 անօդաչու թռչող սարքեր և այլ անօդաչուներ տրամադրելու մեջ:
Հիշեցնենք, որ ԱՄՆ-ը պատժամիջոցներ է սահմանել նրանց դեմ, ովքեր օգնել են Իրանին անօդաչու թռչող սարքեր արտադրել։
Հաղորդվում է նաև, որ ըստ «Մոսադ»-ի ղեկավարի՝ Իրանը մտադիր է Ռուսաստանի Դաշնությանը փոխանցել փոքր և մեծ հեռահարության հրթիռներ։
