Լրացուցիչ միջոցներ են հատկացվել կրթական, մշակութային և մարզական հաստատությունների համար

ՀՀ կառավարության որոշմամբ ԿԳՄՍ նախարարությանը 2023 թվականի պետական բյուջեով հատկացված միջոցներից կատարվել է վերաբաշխում 482 մլն 600 հազար դրամ գումարի չափով՝ կապիտալ ծրագրերի իրականացման համար: Որոշմամբ վերաբաշխման արդյունքում առաջացած մնացորդը՝ 324 մլն 760 հազար դրամն ուղղվել է ՀՀ կառավարության պահուստային ֆոնդ․ տեղեկացնում են ՀՀ ԿԳՄՍՆ-ից։

Որոշմամբ նախատեսվում է ապահովել մի շարք կրթական, մշակութային և մարզական հաստատությունների շինարարական աշխատանքների կատարումը և դրանց համար անհրաժեշտ նախագծումը, ինչպես նաև գույքային հագեցվածության բարելավումը:

Հարցը զեկուցել է ՀՀ կրթության, գիտության, մշակույթի և սպորտի նախարար Ժաննա Անդրեասյանը՝ նշելով, որ կապիտալ ծրագրերն ունեն երեք հիմնական ուղղություն՝ նախագծանախահաշվային փաստաթղթերի մշակում և փորձաքննություն, որում ներառված է 10 ծրագիր, շինարարական աշխատանքների իրականացում՝ 10 ծրագիր և գույքով հագեցվածություն, որը վերաբերում է 5 կազմակերպության: «Ընդ որում՝ ցանկում ներառված են թե՛ կրթական, թե՛ մշակութային, և թե՛ մարզական հաստատություններ: Կրթական հաստատությունների շարքում առկա են «500 մանկապարտեզ, 300 դպրոց» ծրագրում ներառված նախագծեր, որոնք վերաբերում են մոդուլային մանկապարտեզներին: Օրինակ՝ այս որոշմամբ միջոցներ են հատկացվում ՀՀ Վայոց ձորի մարզի Եղեգիս համայնքի Շատին բնակավայրի մանկապարտեզի համար, որտեղ տարիներ շարունակ խնդիր կար, և ահա կունենանք մոդուլային տիպի 250 տեղ հզորությամբ մսուր-մանկապարտեզի հնարավորություն: Կարևորում եմ ՀՀ Կոտայքի մարզի Զովունի գյուղում թեթև կոնստրուկցիաներով մարզադահլիճի կառուցումը: Սա առաջին փորձն է այս տիպի մարզադահլիճների կառուցման. մյուս մարզերում ևս նախատեսվում են նման մարզակառույցներ, որոնք թույլ կտան էապես զարգացնել խաղային մարզաձևերով զբաղվելու հնարավորությունը մարզերում»,-նշել է նախարարը՝ ընդգծելով, որ մի շարք կարևոր ծրագրեր կան նաև մշակութային հաստատությունների բարեկարգման և գույքով հագեցվածության համար:

Նախագծանախահաշվային փաստաթղթեր

ՀՀ Վայոց Ձորի մարզի Եղեգիս համայնքի Շատին բնակավայրում «Մոդուլային» տիպի 250 տեղ հզորությամբ մսուր-մանկապարտեզ /կառուցում/

ՀՀ Լոռու մարզի Լուսաղբյուր համայնքում «Մոդուլային» տիպի 144 տեղ հզորությամբ մսուր-մանկապարտեզ /կառուցում/

«Երևանի հրաձգության մանկապատանեկան մարզադպրոց» ՊՈԱԿ /հրաձգարանների արտաքին և մուտքի դարպասի կողային պատերի ամրացում/

ՀՀ Կոտայքի մարզի Նաիրի համայնքի Զովունի գյուղում թեթև կոնստրուկցիաներով մարզադահլիճ /տեղակապում, կցակառույցի իրականացում, բարեկարգում/

«Հայաստանի պետական սիմֆոնիկ նվագախումբ» ՊՈԱԿ /Երևանի Պռոշյան 1 փակուղի 1 հասցեում գտնվող շինության նախագծի փորձաքննություն/

«Երևանի Վ. Համբարձումյանի անվան թիվ12 հիմնական դպրոց» ՊՈԱԿ /կաթսայատան վերազինում/

«Վաղարշապատի Մեսրոպ Մաշտոցի անվան թիվ 1 հիմնական դպրոց» ՊՈԱԿ /նոր շենքի կառուցում («Էսքիզային նախագիծ» փուլ)/

«Արտաշատի ավագ դպրոց» ՊՈԱԿ /5-րդ մասնաշենքի քանդում/

«Գյումրու «Ֆոտոն» վարժարան» ՊՈԱԿ /ներքին ջեռուցման իրականացման նախագծի փորձաքննություն/

«Ախուրյանի Նիկոլ Աղբալյանի անվան ավագ դպրոց» ՊՈԱԿ /մարզադահլիճի մասնաշենքի կառուցման նախագծի փորձաքննություն/

Շինարարական աշխատանքներ

«Երևանի պետական հումանիտար քոլեջ» ՊՈԱԿ /հարթ տանիքը լանջավոր տանիքի վերակառուցում/

«Երևանի թիվ 4 արհեստագործական ուսումնարան» ՊՈԱԿ /տանիքի նորոգում/

«Երևանի թիվ 9 արհեստագործական ուսումնարան» ՊՈԱԿ /տանիքի նորոգում/

«Երևանի պարարվեստի պետական քոլեջ» ՊՈԱԿ /ուսումնական թատրոնի մասի նախասրահի տանիքի նորոգում/

«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ /«Զվարթնոց» պատմամշակութային արգելոց-թանգարանի ներտարածքային հետիոտնային մայթերի սալիկների, արտաքին լուսավորության վերականգնում/

«Հայաստանի ազգային պատկերասրահ» ՊՈԱԿ /մասնակի նորոգման մեկնարկային աշխատանքներ/

«Սարդարապատի հերոսամարտի հուշահամալիր, Հայոց ազգագրության և ազատագրական պայքարի պատմության ազգային թանգարան» ՊՈԱԿ /կաթսայատան վերազինում/

«Ապարանի ֆիզիկամաթեմատիկական ավագ դպրոց» ՊՈԱԿ /դասասենյակների, միջանցքների և մարզադահլիճի հիմնանորոգում/

«Ալավերդու թիվ 5 ավագ դպրոց» ՊՈԱԿ /կաթսայատան կառուցում և ներքին ջեռուցման իրականացում/

«Երևանի Հ. Թումանյանի անվան պետական տիկնիկային թատրոն» ՊՈԱԿ /հովացման համակարգի արդիականացում/

Գույք

«Պատմամշակութային ժառանգության գիտահետազոտական կենտրոն» ՊՈԱԿ /գույք և սարքավորումներ/

«Հայաստանի ազգային գրադարան» ՊՈԱԿ /ցանցային սերվերներ/

«Գնահատման և թեստավորման կենտրոն» ՊՈԱԿ /դյուրակիր համակարգիչներ/

«Վանաձորի Սայաթ-Նովայի անվան թիվ 10 ավագ դպրոց» ՊՈԱԿ /մարզական գույք/

«Լանջիկի միջնակարգ դպրոց» ՊՈԱԿ /գույք և տեխնիկա/