20.06.2026 | 13:16
5 խաղափուլից հետո հայ շախմատիստները շարունակում են պայքարը առաջատարների խմբում
ԵՄ-ն պետք է վճռական գործի՝ կանխելու ԼՂ-ում էթնիկ զտումները և հարձակումը ՀՀ-ի վրա․ Բունդեսթագի արտաքին հարաբերությունների հանձնաժողովի նախագահ
Քաղաքականություն
20.09.2023 | 18:12
Հայաստանի և Ադրբեջանի միջև հավասար հեռավորության վերաբերյալ ԵՄ ռազմավարությունը ձախողվել է։ Այս մասին X-ի իր էջում գրել է Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթը։
«Մենք հիմա պետք է գործենք արագ ու վճռական՝ կանխելու Լեռնային Ղարաբաղում էթնիկ զտումը և հարձակումը Հայաստանի տարածքի վրա։ Սա միակ լեզուն է, որ հասկանում են Ալիևի նման ավտոկրատները։ ԵՄ-ն պետք է հնարավորինս արագ քաղաքական, տնտեսական պատժամիջոցների ռեժիմ սահմանի՝ Բաքվին բանակցությունների սեղան վերադարձնելու համար։ Ես ողջունում եմ հրադադարը, բայց այն չպետք է օգտագործվի Լեռնային Ղարաբաղում խաղաղ բնակչության տեղահանման համար»,- գրել է Ռոթը։
Նա նշել է, որ ԵՄ-ն պետք է էապես ուժեղացնի Հայաստանում քաղաքացիական դիտորդական առաքելությունը՝ հետագա մոնիթորինգի ենթարկելու ամբողջ Հայաստան-Ադրբեջան սահմանը և շփման գիծը՝ իրավիճակը կայունացնելու և Հայաստանի տարածքի վրա Ադրբեջանի հնարավոր հարձակումները բացահայտելու համար։
«Մենք պետք է աջակցենք Հայաստանում երիտասարդ, բայց փխրուն ժողովրդավարությանը և մոտեցնենք ԵՄ-ին։ Լեռնային Ղարաբաղի էթնիկ զտումները կարող են նպաստել հայկական ժողովրդավարության կործանմանը։ Վիզաների ազատականացումը կլինի մերձեցման առաջին կարևոր քայլը»,- գրել է Բունդեսթագի արտաքին հարաբերությունների հանձնաժողովի նախագահը։
Էմմա Չոբանյան
