15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Կանադայի և Հնդկաստանի հարաբերությունները լարվել են․ կողմերը վտարել են դիվանագետներին
Քաղաքականություն
19.09.2023 | 17:08
Հնդկաստանը հայտարարել է կանադացի բարձրաստիճան դիվանագետի արտաքսելու մտադրության մասին, գրում է Euronews-ը։
Սա տեղի է ունեցել ժամեր անց այն բանից հետո, երբ Օտտավան հնդիկ դիվանագետին հրահանգել է լքել երկիրը՝ Վանկուվերից դուրս սիկհ անջատողականի սպանության պատճառով:
Հնդկաստանի ԱԳՆ հայտարարության մեջ ասվում է, որ Նյու Դելիի որոշումը արտացոլում է «աճող անհանգստությունը երկրի ներքին գործերին կանադացի դիվանագետների միջամտության և հակահնդկական գործունեության մեջ նրանց ներգրավվածության վերաբերյալ»։ Կանադացի դիվանագետին կարգադրվել է հեռանալ Հնդկաստանից «առաջիկա հինգ օրվա ընթացքում»։
Նախօրեին խորհրդարանում ելույթ ունենալիս Կանադայի վարչապետ Ջասթին Թրյուդոն հայտարարել էր, որ կան «արժանահավատ ապացույցներ», թե Հնդկաստանը կարող է պատասխանատու լինել անցյալ տարվա հունիսին երկրի արևմուտքում սիկհերի առաջնորդ, Կանադայի քաղաքացի Հարդիփ Սինգհ Նիջարի սպանության համար: Նա սպանվել էր իր ավտոմեքենայում՝ կայանատեղիից դուրս գալիս։
Կանադայի արտաքին գործերի նախարար Մելանի Ջոլին էլ լրագրողներին հայտնել է, որ կանադական իշխանությունները գործի առնչությամբ երկրից վտարել են հնդիկ դիվանագետի։ Նա չի նշել դիվանագետի անունը, սակայն ասել է, որ նա Հնդկաստանի արտաքին հետախուզական գործակալության Հետազոտությունների և վերլուծությունների բաժնի աշխատակից է եղել։
Նյու Դելին այս մեղադրանքներն «անհեթեթ» է անվանել։
Էմմա Չոբանյան
