Էրդողանը կարծում է, որ Ուկրաինայում ռազմական հակամարտությունը երկար կտևի

Թուրքիայի նախագահ Ռեջեփ Թայիփ Էրդողանը կարծում է, որ Ուկրաինայում ռազմական գործողությունները շուտով չեն ավարտվի։ Նրա կարծիքով՝ չնայած զինված հակամարտությունը խաղաղ ճանապարհով լուծելու բոլոր ջանքերին, ամեն դեպքում, այն «բավականին երկար կտևի», գրում է Կոմերսանտը։

«Շատ բաց և հստակ լինելու համար ասեմ՝ միանգամայն պարզ է, որ այս պատերազմը երկար կտևի և շուտով չի ավարտվի»,- ասել է Էրդողանը ամերիկյան PBS հեռուստաալիքին տված հարցազրույցում։

Միաժամանակ, նրա խոսքով, Անկարան կշարունակի ջանքեր գործադրել Ուկրաինայում խաղաղություն հաստատելու համար։

Թուրքիայի նախագահը նաև ընդգծել է, որ ոչ միայն ինքը, այլև ՌԴ նախագահ Վլադիմիր Պուտինը կցանկանար, որ հակամարտությունը շուտափույթ ավարտվի։

«Վլադիմիր Պուտինը, ինչպես և ես, հանդես է գալիս Ուկրաինայում պատերազմի շուտափույթ դադարեցման օգտին: Ես սա ասում եմ միայն նրա խոսքերից․ Պուտինը ցանկանում է, որ այս պատերազմը որքան հնարավոր է՝ շուտ ավարտվի»,- ասել է նա։

Հիշեցնենք, որ ՆԱՏՕ-ի գլխավոր քարտուղար Յենս Ստոլտենբերգը բազմիցս հայտարարել է, որ Ուկրաինայում ռազմական հակամարտությունը երկարատև է լինելու։ Նա կարծում է, որ չնայած շուտափույթ խաղաղության ձգտմանը՝ եթե Ուկրաինան դադարեցնի պայքարը, երկիրը կվերանա։ Նրա խոսքով՝ Հյուսիսատլանտյան դաշինքի երկրների քաղաքականությունն անփոփոխ է, և նրանք մտադիր են Ուկրաինային օգնել մինչև հակամարտության ավարտը։

Գրեթե 30 երկրներ խոսել են Ուկրաինային երկկողմ հիմունքներով անվտանգության երաշխիքներ տրամադրելու պատրաստակամության մասին։ Համապատասխան համաձայնագրերը նախատեսում են միջանկյալ լուծում դառնալ՝ նախքան ՆԱՏՕ-ին Ուկրաինայի անդամակցելը։ Ուկրաինայի նախագահը ՆԱՏՕ-ին անդամակցելու դիմում է ներկայացրել 2022 թվականի սեպտեմբերի 30-ին։ Հուլիսի 11-ին դաշինքի երկրները որոշել են պարզեցնել Ուկրաինայի՝ ՆԱՏՕ-ին անդամակցելու ճանապարհը՝ չեղարկելով անդամակցության գործողությունների ծրագրի իրականացումը։