07.10.2026 | 23:48
Արթուր Դանիելյանը կալանավորվեց
Ուկրաինայի նախագահ Վլադիմիր Զելենսկին ժամանել է ԱՄՆ
Քաղաքականություն
19.09.2023 | 12:17
Ուկրաինայի նախագահ Վլադիմիր Զելենսկին ժամանել է ԱՄՆ։ Սեպտեմբերի 18-ի երեկոյան Նյու Յորք ժամանելուն պես նա այցելել է Սթեյթն Այլենդի համալսարանական հիվանդանոց, որտեղ բուժվում և վերականգնվում են ծանր վիրավոր ուկրաինացի զինվորները, գրում է DW-ի ռուսական ծառայությունը։
Զելենսկին զրուցել է բժիշկների և զինվորականների հետ։ «Մենք ձեզ կսպասենք, որպեսզի հաղթենք թշնամուն։ Առողջացեք, վերադարձեք, կհաղթենք»,- ասել է նա ուկրաինացիներին։ Telegram-ում Զելենսկին գրել է, որ պետական պարգևներ է հանձնել զինվորականներին և «լսել է չափազանց կարևոր խոսքեր ուկրաինացիների անընկճելիության և ընդհանուր հաղթանակի մասին»։ «Շնորհակալություն բժիշկների թիմին, որոնք օգնում են մեր տղաներին ապաքինվել վնասվածքներից»,- հավելել է նա:
Սեպտեմբերի 19-ին Զելենսկին ելույթ կունենա ՄԱԿ-ի Գլխավոր ասամբլեայի նստաշրջանում։ Բացի այդ, նախատեսվում է նրա մասնակցությունը ՄԱԿ-ի շրջանակներում մի շարք այլ միջոցառումների, այդ թվում՝ Կայուն զարգացման նպատակների գագաթնաժողովին և Անվտանգության խորհրդի նիստին:
Ի թիվս այլ բաների, «նախատեսված են կարևոր երկկողմ հանդիպումներ», – ասել է Ուկրաինայի նախագահը։ Մասնավորապես, հայտնի է Բրազիլիայի նախագահ Լուլա դա Սիլվայի, ինչպես նաև Իսրայելի վարչապետ Բենիամին Նեթանյահուի հետ բանակցությունների պլանների մասին։
