15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
ՌԴ-ի կողմից օկուպացված ուկրաինական տարածքներից ածուխն արտահանվում է Թուրքիա․ Reuters
Քաղաքականություն
19.09.2023 | 13:36
Ռուսաստանի կողմից օկուպացված Ուկրաինայի տարածքներում արդյունահանված ածուխն այս տարի արտահանվել է Թուրքիա։ Այս մասին գրում է Reuters-ը՝ վկայակոչելով ռուսական մաքսատան տվյալները։
Այդ տվյալների համաձայն՝ 2023 թվականի փետրվարից հուլիսն ընկած ժամանակահատվածում Դոնեցկի և Լուգանսկի շրջաններից Թուրքիա է մատակարարվել ավելի քան 160 տոննա ածուխ։ Մաքսային տվյալներում թվարկված երեք արտադրողներ գործակալության հետ զրույցում հաստատել են, որ այս ընթացքում ածուխ են մատակարարել Թուրքիա։
Ի տարբերություն ԱՄՆ-ի և Եվրամիության՝ Թուրքիան չի սահմանափակել առևտուրը Ռուսաստանի կամ Մոսկվայի կողմից վերահսկվող Ուկրաինայի տարածքների հետ, հիշեցնում է Reuters-ը։ Այնուամենայնիվ, Վաշինգտոնը նախազգուշացրել է ընկերություններին՝ չօգնել Ռուսաստանին Ուկրաինայի դեմ պատերազմ մղելու կամ պատժամիջոցները շրջանցելու հարցում:
Թուրքիայի Առևտրի և մաքսային նախարարությունն առայժմ չի պատասխանել ածխի առաքումների վերաբերյալ մեկնաբանությունների հարցումներին։
