15.09.2026 | 21:24
Հրապարակվել են հոկտեմբերի 25-ին կայանալիք ՏԻՄ ընտրությունների ընտրողների ցուցակները
Բայդենը ՄԱԿ-ի Անվտանգության խորհրդի կազմն ընդլայնելու առաջարկ կներկայացնի
Քաղաքականություն
18.09.2023 | 11:47
ԱՄՆ նախագահ Ջո Բայդենը ՄԱԿ-ի Գլխավոր ասամբլեայի առաջիկա նստաշրջանի իր ելույթում պլանավորում է առաջարկ ներկայացնել ՄԱԿ-ի Անվտանգության խորհրդի մշտական անդամների կազմն ընդլայնելու վերաբերյալ: «Արմենպրես»-ի փոխանցմամբ՝ այս մասին հայտարարել է Սպիտակ տան Ազգային անվտանգության խորհրդի խոսնակ Ջոն Քիրբին։
«Կարծում եմ՝ նախագահ Բայդենը… փոքր-ինչ մանրամասնորեն կպատմի այդ մասին: Մենք հստակ հասկացրել ենք, որ կարծում ենք՝ եկել է ժամանակը՝ բարձրացնելու Անվտանգության խորհրդի կառուցվածքի հարցը», – ասել է նա բրիտանական The Telegraph-ին տված հարցազրույցում։
Քիրբին հավելել է, որ ՄԱԿ-ի Անվտանգության խորհրդի կազմը պետք է լինի «ավելի ներառական»։
Հրատարակությունը գրում է, որ Բայդենի համոզմամբ՝ ՄԱԿ-ի Անվտանգության խորհրդի կազմ «հինգ կամ վեց» նոր մշտական անդամներ պետք է մտնեն, այդ թվում՝ Հնդկաստանը, Բրազիլիան, Գերմանիան և Ճապոնիան։ Բրազիլիան և Հարավային Աֆրիկան նաև հիշատակվել են որպես Անվտանգության խորհրդի հնարավոր մշտական անդամներ, «սակայն պարզ չէ, թե արդյոք նրանք կունենան վետոյի իրավունք»։
Այժմ ՄԱԿ-ի ԱԽ-ն ունի հինգ մշտական անդամ՝ ԱՄՆ-ն, Մեծ Բրիտանիան, Ֆրանսիան, Ռուսաստանը և Չինաստանը։ Խորհրդի կազմում են նաև 10 ոչ մշտական անդամներ, որոնք ընտրվում են երկու տարի ժամկետով։
