23.02.2026 | 16:56
31-ամյա տղամարդու սպանության մեջ կասկածվողը կալանավորվել է
Իրանում հարյուրավոր մարդիկ են ձերբակալվել
Քաղաքականություն
18.09.2023 | 15:15
Իրանի իշխանությունները քրդուհի Մահսա Ամինիի մահվան առաջին տարելիցին ձերբակալել են ավելի քան 260 մարդու։ Այս մասին հայտնել է Shargh թերթը՝ վկայակոչելով տեղի անվտանգության մարմիններին։
Ձերբակալությունները կատարվել են սեպտեմբերի 16-ին՝ 24 ժամվա ընթացքում։ Անվտանգության մարմինները դրանք հիմնավորել են հասարակական անվտանգության կանոնների խախտումներով, բողոքի ցույցեր հրահրելու կամ զենք պահելու համար, գրում է DW-ի ռուսական ծառայությունը:
Մահսա Ամինիի մահվան տարելիցին ընդառաջ Իրանի իշխանություններն անվտանգության խիստ միջոցներ են ձեռնարկել՝ կանխելու հետագա բողոքի ցույցերը։ Իրանի արևմուտքում գտնվող Սեքքեզ քաղաքում երիտասարդ աղջկա ընտանիքի տան մոտ մեծ թվով ոստիկաններ են տեղակայվել, հայտնում են իրավապաշտպանները։
Մահսայի հայրը՝ Ամջադ Ամինին սեպտեմբերի 16-ի երեկոյան սգո միջոցառում է հայտարարել դստեր հիշատակին։ Երկրից դուրս գործող իրանական լրատվամիջոցների փոխանցմամբ՝ տղամարդուն կանչել են ոստիկանական բաժանմունք և նախազգուշացրել, բայց հետո ազատ են արձակել։
Սեպտեմբերի 15-ին Եվրամիությունը, Միացյալ Նահանգները և Մեծ Բրիտանիան նոր պատժամիջոցներ են սահմանել Իրանի դեմ՝ բողոքի ցույցերը ճնշելու համար։ Իսլամական Հանրապետության ԱԳ նախարարությունն այս գործողություններն անվանել է «անօրինական և ոչ դիվանագիտական»:
Ամինին մահացել է 2022 թվականի սեպտեմբերի 16-ին՝ բարքերի ոստիկանության կողմից ձերբակալվելուց հետո։
Ցուցարարները Մահսայի մահվան մեջ մեղադրել են Իրանի կառավարությանը։ Իրանուհիները սոցցանցերում զանգվածաբար սկսել են տեսանյութեր հրապարակել, որոնցում կտրում էին իրենց մազերն ու այրում հիջաբը։
