30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Հռոմի ստատուտը վավերացվում է ոչ թե ՌԴ-ի դեմ, այլ ՀՀ տարածքում Ադրբեջանի ռազմական հանցագործությունների պատճառով․ Մարուքյան
Քաղաքականություն
17.09.2023 | 11:54
Բողոքի ցանկացած նոտայի ՀՀ Արտաքին գործերի նախարարությունը կարձագանքի ընթացակարգերին համապատասխան։ Այս մասին ռուսական ՏԱՍՍ գործակալությանը տված հարցազրուցում ասել է ՀՀ հատուկ հանձնարարություններով դեսպան Էդմոն Մարուքյանը՝ անդրադառնալով հարցին, որ օրերս ՌԴ-ում Հայաստանի դեսպանին նոտա է հանձնվել Նիկոլ Փաշինյանի կնոջ՝ Ուկրաինա, մասնավորապես՝ Բուչա այցի կապակցությամբ, բացի այդ, Մոսկվան դժգոհ է հայ-ամերիկյան զորավարժություններից և Երևանի՝ Հռոմի ստատուտը վավերացնելու ցանկությունից։
«Հայ-ամերիկյան զորավարժությունները տեղի են ունենում խաղաղապահ առաքելության շրջանակում։ Առաջին անգամ դրանք անցկացվել են 2011 թվականին, բայց նույնիսկ այն ժամանակ հարցեր չեն եղել։ Սրանք առաջին զորավարժությունները չեն, դրանք շարունակական են և իրականացվում են խաղաղապահ առաքելությունների շրջանակում, որոնց մասնակցում է մեր երկիրը»,- ասել է նա։
Ինչ վերաբերում է Հռոմի ստատուտին, Մարուքյանն ասել է, որ որպես իրազեկ անձ՝ կարող է ասել, որ այս հարցով առաջարկ է արվել Ռուսաստանի Դաշնությանը, հանդիպում է եղել, գործընթացն ընթացքի մեջ է։
«Հասկանալի է, որ Հռոմի ստատուտը վավերացվում է ոչ թե Ռուսաստանի Դաշնության դեմ, այլ Հայաստանի Հանրապետության տարածքում ադրբեջանական կողմից կատարված ռազմական հանցագործությունների պատճառով։ Դա քաջ գիտակցում են մեր ռուս գործընկերները։ Այս գործերը պետք է դառնան միջազգային քրեական հետապնդման առարկա»,- նշել է Էդմոն Մարուքյանը։
ՀԱՊԿ-ի՝ հայ-ադրբեջանական սահման առաքելություն ուղարկելու պատրաստակամության և ՀՀ-ի կողմից այդ առաջարկի մերժման մասին հարցին ի պատասխան էլ Մարուքյանը նշել է, որ այդ թեման բազմիցս է քննարկվել։
«Ադրբեջանական ագրեսիայից հետո, որի ընթացքում զոհվել է ավելի քան 200 մարդ, ժամանել է ՀԱՊԿ-ի փաստահավաք առաքելությունը։ Մենք ակնկալում էինք քաղաքական գնահատական և ՀԱՊԿ մեխանիզմների իրականացում։ Դա չեղավ։ Հիմա կան խնդիրներ, որոնք պետք է լուծվեն։ Մենք անկեղծ ու բաց խոսում ենք խնդիրների մասին, ինչպես մեր գործընկերները։ Մենք շարունակում ենք կանխատեսելի լինել մեր գործընկերների համար, մեր խնդիրն է՝ պաշտպանել Հայաստանի տարածքային ամբողջականությունը»,- եզրափակել է նա։
