15.09.2026 | 10:56
Գալուզինը ԵՄ-ի՝ Հայաստանին տրված խոստումները «վերացական» է անվանել
ՀՀ ՄԻՊ-ն անդրադարձել է մանկապարտեզներից մեկում աշխատակիցների կողմից սաների նկատմամբ բռնության դեպքին
Հասարակություն
17.09.2023 | 11:09
Երեխայի լավագույն շահը, նրա իրավունքների պաշտպանությունը մարդու իրավունքների պաշտպանի առաջնահերթություններից են․ այս մասին հայտարարություն է տարածել Հայաստանի Հանրապետության մարդու իրավունքների պաշտպանն՝ անդրադառնալով համացանցում տարածված տեսանյութին, որտեղ երևում է, որ մանկապարտեզի աշխատակիցները բռնության ենթարկում սաներին:
«Սեպտեմբերի 16-ին համացանցում հրապարակվել է տեսանյութ, որում պատկերված է, թե ինչպես են մանկապարտեզի աշխատակիցները բռնության ենթարկում սաներին: Մարդու իրավունքների պաշտպանի հանձնարարությամբ՝ աշխատակազմում անմիջապես սկսվել է ուսումնասիրություն:
ՄԻՊ աշխատակազմն անմիջապես կապ է հաստատել ՆԳՆ ոստիկանության ներկայացուցիչների հետ՝ միջադեպի առնչությամբ անհրաժեշտ քայլեր ձեռնարկելու նպատակով:
Երեխայի լավագույն շահը, նրա իրավունքների պաշտպանությունը Մարդու իրավունքների պաշտպանի առաջնահերթություններից են»,- ասված է հայտարարության մեջ:
Պաշտպանն ընդգծել է, որ պետությունն ունի պարտավորություն` ձեռնարկելու անհրաժեշտ և բավարար միջոցներ՝ երաշխավորելու երեխայի պաշտպանությունը բռնությունից։
Երեխայի լավագույն շահից ելնելով` ՄԻՊ-ը հորդորում է չտարածել սոցիալական ցանցերում հայտնված տեսանյութը՝ զերծ մնալով երեխային նույնականացնող անձնական տվյալները հրապարակելուց։
