Սոցցանցում գրառման համար Թուրքիայում քուրդ լրագրողն ազատազրկման է դատապարտվել

Թուրքական դատարանը 15 ամիսամկետով պայմանական ազատազրկման է դատապարտել քուրդ լրագրողուհուն՝ սոցիալական ցանցերի գրառումներով «ահաբեկչական քարոզչություն տարածելու» մեղադրանքով, գրում է Turkish Minute-ը։

Հաղորդվում է, որ Kurdish Yeni Yaşam-ի լրագրող Ռոջին Ալթայի նկատմամբ պատժի որոշումը կայացվել է Ստամբուլի 22-րդ բարձր քրեական դատարանի կողմից։ Դա եղել է առաջին ու վերջին դատական նիստը։

Ալթայը հունվարին կարճ ժամանակով ձերբակալվել էր Ստամբուլի Սաբիհա Գյոքչենի անվան օդանավակայանում, երբ պատրաստվում էր թռչել Դիարբեքիր։ Ավելի ուշ նրան մեղադրանք է առաջադրվել ահաբեկչական կազմակերպությանն անդամակցելու և Քուրդիստանի աշխատավորական կուսակցության (PKK) համար «ահաբեկչական քարոզչություն տարածելու մեղադրանքով»։

Քուրդ լրագրողները հաճախ են մեղադրվում ահաբեկչության հետ կապված՝ քրդերի, նրանց խնդիրների կամ PKK-ի մասին իրենց հրապարակումների պատճառով։

Սոցիալական մեդիայի գրառումը, որն էլ Ալթայի դեմ քրեական հետապնդման պատճառ է դարձել, եղել է նրա «ռեթվիթը», որտեղ պատկերված է Սաքինե Ջանսըզը՝ PKK-ի հիմնադիրներից մեկը, որը սպանվել է երկու այլ քուրդ կանանց հետ Փարիզի մշակութային կենտրոնում 2013 թվականին:

Նա գրել է. «Դիմադրությունը կյանք է»։

Դատարանը մերժել է լրագրողի փաստաբանի՝ նրան արդարացնելու միջնորդությունը և նվազագույն պատիժ սահմանել։

Հավելենք, որ Թուրքիան խոսքի և մամուլի ազատության առումով աշխարհում ունի վատագույն ցուցանիշներից մեկը։ Թուրքիան 165-րդ տեղում է «Լրագրողներ առանց սահմանների» 2023 թվականի մամուլի ազատության համաշխարհային ինդեքսում՝ 180 երկրների շարքում։

Էմմա Չոբանյան