Քաղաքականություն
15.09.2023 | 23:30
Թուրքիայի նախագահ Ռեջեփ Թայիփ Էրդողանը, ում ընդդիմադիրները քննադատում են խորհրդականների թվի պատճառով, պահանջել է նրանցից 14-ի հրաժարականը, գրում են թուրքական լրատվամիջոցները։
Նշվում է, որ խորհրդականների թվում են իշխող «Արդարություն և զարգացում» կուսակցության նախկին պատգամավոր Այշե Նուր Բահչեքափըլն, պրոֆեսոր Իբրահիմ Սարաջօղլուն, որը հայտնի է բնական մեթոդներով բուժումներով, արդարադատության նախկին նախարար Ֆահրի Քասըրգան և նախկին լրագրող Իլնուր Չևիկը։
Երբ լրատվամիջոցները տեղեկացնում էին Էրդողանի խորհրդականների հեռանալու մասին, պարզ չէր, թե ինչու է Թուրքիայի նախագահը նման որոշում կայացրել։ Սակայն սյունակագիր Հանդե Ֆիրաթն իշխանամետ Hürriyet-ում հայտնում է, որ Էրդողանի որոշումը՝ բաժանվել իր 14 խորհրդականներից, հիմնված է երիտասարդներ հավաքագրելու նրա մտադրության, ինչպես նաև փոփոխությունների ցանկության վրա: Ֆիրաթը նշում է, որ խորհրդականների մեծ մասի տարիքը 65 տարեկանից բարձր է, և որ 14-ից յուրաքանչյուրը կանչվել է Էրդողանի որոշման մասին իրենց տեղեկացվելու։ Նրանց խնդրել են հրաժարականի դիմում ներկայացնել:
Հայտնի չէ, թե Էրդողանը քանի խորհրդական ունի, սակայն նախագահի քննադատներն ասում են, որ նա վատնում է հարկատուների փողերը նրանց աշխատավարձերի վրա, և նշում, որ նրանք համապատասխան որակավորում չունեն՝ նախագահին որպես խորհրդական ծառայելու համար:
Էմմա Չոբանյան
