Մեծ Բրիտանիան «Վագներ»-ը ներառել է ահաբեկչական կազմակերպությունների ցանկում

Մեծ Բրիտանիայի Ներքին գործերի նախարարությունը հայտարարել է ռուսական «Վագներ» ռազմականացված խմբավորումն ահաբեկչական կազմակերպությունների ցուցակում ընդգրկելու մասին։ Որոշումը, ըստ բրիտանական կառավարության կայքում հրարարակված հաղորդագրության, ուժի մեջ է մտնում անմիջապես։ Նրանք, ովքեր ակտիվորեն աջակցում են «Վագներ»-ին կամ հանդիսանում են դրա անդամներ, այժմ կենթարկվեն քրեական պատիժների՝ ընդհուպ մինչև 14 տարի ժամկետով ազատազրկման, փոխանցում է Մեդուզան:

Միացյալ Թագավորությունը մի քանի ամիս առաջ հայտնել էր «Վագներ»-ն ահաբեկչական կազմակերպություն հայտարարելու մասին: Այնուամենայնիվ, «Վագներ»-ի հիմնադիր Եվգենի Պրիգոժինի կողմից կազմակերպված ապստամբությունից հետո, ըստ տեղեկությունների, որոշվել է ժամանակավորապես հրաժարվել այդ ծրագրերից, քանի որ «Ռուսաստանի նախագահ Վլադիմիր Պուտինի հայտարարությունները, որ վարձկանները ֆինանսավորվում են Ռուսաստանի բյուջեից, կարող էին լրացուցիչ դիվանագիտական և իրավական բնույթի ռիսկեր առաջացնել»։

Օգոստոսի 23-ին ինքնաթիռը, որում, ի թիվս այլոց, եղել են Եվգենի Պրիգոժինը և «Վագներ»-ի հրամանատար Դմիտրի Ուտկինը, կործանվեց Տվերի մարզում։ Ինքնաթիռում գտնվող բոլորը մահացան։

Դեռևս Պրիգոժինի և Ուտկինի մահից առաջ հաղորդվում էր, որ ռուսական իշխանությունները փորձում են այս կամ այն ձևով վերահսկողության տակ առնել «Վագներ»-ը կամ դրա վարձկաններին։

BBC News-ի թղթակից Ֆրենկ Գարդները նշել է, որ թեև «Վագներ»-ը հեռու է մի քանի ամիս առաջ ունեցած ազդեցությունից, այնուամենայնիվ, «մնում է լուրջ և պոտենցիալ կործանարար ուժ այն երկրներում, որտեղ կազմակերպությունը շարունակում է ներկա և ակտիվ լինել»:

Բրիտանական ԶԼՄ-ները նշում են նաև, որ «Վագներ»-ի ընդգրկումն ահաբեկչական կազմակերպությունների ցուցակում նախատեսում է Մեծ Բրիտանիայում կազմակերպության ամբողջ ունեցվածքի բռնագրավում։