30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ջո Բայդենի որդուն ապօրինի զենք ձեռք բերելու մեղադրանք է առաջադրվել
Քաղաքականություն
15.09.2023 | 14:04
ԱՄՆ նախագահ Ջո Բայդենի որդուն՝ Հանթեր Բայդենին պաշտոնական մեղադրանք է առաջադրվել ապօրինի կերպով հրազեն գնելու համար։ Այսպիսով ավարտվել է երկարատև քննությունը, որին հետևելու է դատական գործընթացը, գրում է Euronews-ը։
Մեղադրանքի էությունն այն է, որ 2018 թվականի հոկտեմբերին զենք գնելու փաստաթղթերը լրացնելիս Բայդենը ստել է՝ նշելով, որ թմրանյութ չի օգտագործել և թմրանյութերից կախվածություն չունի։ Սակայն հայտնի է, որ այդ ժամանակ նա պայքարել է կոկաինի նկատմամբ կախվածության դեմ։ Այս մասին ասվում է Դելավերի դաշնային դատարանում ներկայացված մեղադրական եզրակացության մեջ։
Ավելի վաղ Հանթեր Բայդենի՝ արդարադատության հետ գործարքը ձախողվել էր։ Ըստ դրա՝ նա պետք է իրեն մեղավոր ճանաչեր 2017 և 2018 թվականներին 4 միլիոն դոլար եկամուտի հարկերից խուսափելու մեջ, ինչը նրան երաշխավորում էր խուսափել ազատազրկումից։ Գործարքը արժանացել է Հանրապետական կուսակցության սուր քննադատությանը։
Այժմ Բայդեն կրտսերին սպառնում է մինչև 25 տարվա ազատազրկում։ Սակայն, Արդարադատության նախարարության պարզաբանմամբ, «նման բնույթի հանցագործության համար փաստացի պատիժը, որպես կանոն, առավելագույն ժամկետից քիչ է լինում»։
Հանթեր Բայդենի փաստաբանն էլ պնդում է, որ իր պաշտպանյալը չի խախտել օրենքը և պաշտպանված է անձեռնմխելիության կետով, որը եղել է մեղքն ընդունելու գործարքի մի մասը։
Էմմա Չոբանյան
