15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Կիևում բացվել է Միջազգային քրեական դատարանի դաշտային գրասենյակը
Քաղաքականություն
15.09.2023 | 12:45
Կիևում աշխատանքն է սկսել Միջազգային քրեական դատարանի դաշտային գրասենյակը։ Այս մասին հայտնում է Ուկրաինայի Գլխավոր դատախազության մամուլի ծառայությունը, փոխանցում է DW-ի ռուսական ծառայությունը։
«Սա մեր համագործակցության նոր գլուխն է։ Գրասենյակի աշխատանքը կօգնի Ուկրաինայի և Միջազգային քրեական դատարանի միջև փոխգործակցության ամրապնդմանը: Այն կբարձրացնի արձագանքման արդյունավետությունն ու արագությունն այն հանցագործությունների նկատմամբ, որոնք Ռուսաստանը շարունակում է ամեն օր կատարել Ուկրաինայի և ուկրաինացիների դեմ»,- ասել է Ուկրաինայի գլխավոր դատախազ Անդրեյ Կոստինը։
Նշվում է, որ Կիևում գրասենյակն ամենամեծն է Հաագայում ՄՔԴ-ի ներկայացուցչությունից դուրս։
«Օրենքը պետք է լինի առաջնագծում։ Կարծում եմ՝ այն, ինչ մենք տեսնում ենք Միջազգային քրեական դատարանի և Ուկրաինայի միջև գործընկերության, քաղաքացիական հասարակության, ՄԱԿ-ի անդամ մյուս երկրների, ՄՔԴ-ի պետական և ոչ պետական մասնակիցների հետ գործընկերության զարգացման հարցերում, պարզապես կայծ չէ: Այն նոր ժամանակների արշալույսն է, որում մենք ցուցաբերում ենք տոկունություն և համառություն, որպեսզի մեր բառերը դատարկ խոսքեր չլինեն»,- ասել է ՄՔԴ-ի գլխավոր դատախազ Քարիմ Խանը:
Ուկրաինայի նախագահ Վլադիմիր Զելենսկին իր ուղերձում համոզմունք է հայտնել, որ Ուկրաինայի Գլխավոր դատախազության, ուկրաինական բոլոր իրավապահ կառույցների և Միջազգային քրեական դատարանի միջև սերտ համագործակցությունը կօգնի ավելի մոտեցնել Ռուսաստանի կողմից կատարված ռազմական հանցագործությունների պատասխանատվությունը։
Էմմա Չոբանյան
