ԱՄՆ-ը պատժամիջոցներ է սահմանել թուրքական ընկերությունների դեմ՝ ՌԴ-ին պատերազմում օգնելու համար

Բայդենի վարչակազմը պատժամիջոցներ է սահմանել թուրքական հինգ ընկերությունների և թուրք գործարարի նկատմամբ՝ Ռուսաստանին Ուկրաինայի դեմ պատերազմում օգնելու համար, գրում է Middle East Eye-ը։

Պատժամիջոցները սահմանվել են ընկերությունների նկատմամբ, որոնց ԱՄՆ-ը մեղադրում է ռուսական նավերի վերանորոգման և ռուսական ընկերություններին «երկակի նշանակության» ապրանքներ մատակարարելու մեջ: Ընկերությունները ներառվել են ԱՄՆ Ֆինանսների նախարարության և Պետքարտուղարության կողմից 150 օտարերկրյա ընկերությունների և անհատների նկատմամբ կիրառված պատժամիջոցների լայնածավալ ցանկում:

Մի քանի թուրքական ընկերություններ էլ ապրիին էին պատժամիջոցների ենթարկվել ԱՄՆ-ի կողմից՝ Ռուսաստանի ռազմական արդյունաբերությանն աջակցելու համար։

«ԱՄՆ Ֆինանսների նախարարությունը բազմիցս Թուրքիայի կառավարության և թուրքական մասնավոր հատվածի հետ շփումներում բարձրացրել է Ռուսաստան երկակի նշանակության ապրանքների առաքման կամ փոխադրման հարցը»,- ասվում է Ֆինանսների նախարարության հայտարարության մեջ։

Պատժամիջոցներ են սահմանվել Margiana Insaat Dis Ticaret-ի դեմ։ Նշվում է, որ այն «հարյուրավոր մատակարարումներ» է իրականացրել ռազմական անօդաչու թռչող սարքեր արտադրող ռուսական ընկերություններին: Մյուս ընկերությունը Demirci Bilisim Ticaret Sanayi-ն է, որը մեղադրվում է Ռուսաստան սենսորներ և չափիչ գործիքներ ուղարկելու մեջ։ Եվս մեկ թուրքական ընկերություն՝ CTL Limited-ը, մեղադրվում է Ռուսաստան արևմտյան երկրներից ստացված բարձր առաջնահերթ էլեկտրոնային բաղադրիչներ մատակարարելու մեջ։

Պատժամիջոցներ են կիրառվել թուրքական Denkar Ship Construction-ի նկատմամբ նավերի վերանորոգման ծառայություններ մատուցելու համար, որոնք, ըստ ԱՄՆ-ի, կապված են Ռուսաստանի Պաշտպանության նախարարության հետ: ID Shipping նավաշինական գործակալությունը և դրա սեփականատեր Իլքեր Դողրույոլը նույնպես պատժամիջոցների ցանկում են՝ ռուսական նավերին վերանորոգման ծառայություններ մատուցելու համար։

Էմմա Չոբանյան