15.09.2026 | 19:51
«Չենք մոռանա մեր դեմ կատարված վայրագությունները»․ Ալիևը ՀՀ-ին մեղադրել է «հանցագործությունների» մեջ
Պարեկային ծառայությունում 100 հաստիք է ավելացվելու․ նրանց համար կգնվեն էլեկտրամոբիլներ․ ՏԵՍԱՆՅՈՒԹ
14.09.2023 | 13:32
Էլեկտրական շարժիչով աշխատող տրանսպորտային միջոցների ներկրումը խթանելու համար ավելացված արժեքի հարկի արտոնությունը երկարաձգվեց ևս մեկ տարով՝ մինչև 2025 թվականի հունվարի 1-ը:
Վարչապետն ուրախությամբ արձանագրեց, որ ՀՀ-ում էլեկտրամոբիլների նկատմամբ ընկալումն աճում է, և դա, մեծ հաշվով, լավ լուր է:
«Ուրախությամբ պետք է արձանագրեմ նաև, որ Երևանում պարեկային ոստիկանությունն արդեն իսկ օգտագործում է էլեկտրական շարժիչով ավտոմեքենաներ: Մենք լարված հետևում էինք, թե ինչ կասեն մեր հարգելի ոստիկաններն այդ մեքենաների գործունեության մասին: Պետք է ասեմ, որ շատ դրական արձագանք ունեն, բայց սպասում ենք, որ մի քիչ ավելի երկար ժամանակի համար անենք որոշակի հետևություններ: Ուրախությամբ պետք է արձանագրեմ, որ արդեն Երևանում առաջին էլեկտրական ավտոբուսն է դուրս եկել երթուղի»,- ասաց վարչապետը:
Անդրադառնալով պարեկային ոստիկանությանը՝ Նիկոլ Փաշինյանը նշեց, որ եթե ծառայության հետ անհամատեղելի խնդրահարույց հարցեր չծագեն, պայմանավորվածություն է առկա, որ Երևանի պարեկային ոստիկանության համար հետագայում նոր մեքենաներ ձեռք բերելիս ձեռք կբերեն միայն էլեկտրական շարժիչով ավտոմեքենաներ, այնուհետև դա փորձնական կկիրառվի նաև մարզերում:
Հիմնական խնդիրը, ըստ վարչապետի, որը ներկայումս ծագում է, մեքենաների լիցքավորման խնդիրն է:
Նիկոլ Փաշինյանը հարց ուղղեց՝ արդյոք որոշումներում դրվե՞լ է մեքենաների թարմության որոշակի ցենզ, ինչին ի պատասխան՝ փոխվարչապետ Մհեր Գրիգորյանը պատասխանեց, որ դեռ չի դրվել, որպեսզի շահառուների կրիտիկական քանակ ձևավորվի, որ ենթակառուցվածքային հարցը լուծվի:
«Այս ոլորտում երկու մեծ պրոբլեմ ունենք՝ մեկը մեքենաների ուտիլիզացիան է, մեզ պետք են ենթակառուցվածքների զարգացման սցենարներ, բայց մենք 2025-ից կունենանք նպատակային խթանման ծրագիր, որովհետև իրոք կարող ենք հայտնվել մի իրավիճակում, որ ամբողջ աշխարհը ուտիլիզացման ենթակա տրանսպորտային միջոցները ուղարկի Հայաստան: Մենք ուշադիր հետևելու ենք, որ նման բան տեղի չունենա։
Ամփոփելով՝ ասեմ, որ դեռևս 2024-ը կլինի լայնամասշտաբ արտոնության տարի, դրանից հետո կարգավորումներով այդ հարցերը կկարգավորենք, որպեսզի թիրախում լինի նոր մեքենան, նոր շահառուն»,- ասաց Մհեր Գրիգորյանը:
«Մենք արդեն ունենք նոր ընդունելության հայտարարություն, որտեղ գերակշիռ տեղերը կանանցն են: Դրա շրջանակներում Երևանի պարեկային ծառայության համար շուրջ նոր 100 հաստիք ենք հատկացնելու»,- այս մասին հայտնեց ՆԳ նախարարի տեղակալ Արփինե Սարգսյանը:
«Մինչև ուսումնառության սկիզբը կհասցնենք գնահատումն իրականացնել էլեկտրոմոբիլների արդյունավետության հետ կապված ծառայության տեսանկյունից, և արդեն նոր գնումը՝ շուրջ 100 հաստիքի համար, կանենք էլեկտրոմոբիլների տրամաբանության մեջ: Մեր այսօրվա պարկը բավարարում է միայն առկա հաստիքակազմի համար, նոր՝ շուրջ 450 հաստիքների համար ենթադրելու է ավտոպարկի թարմացում»,- նշեց փոխնախարարը:
Վարչապետը Նիկոլ Փաշինյանն հետաքրքրվեց՝ նոր ընդունելությամբ շուրջ 70 տոկոսը կանա՞յք են լինելու, ի պատասխան՝ Արփինե Սարգսյանը նշեց՝ շուրջ 81 տոկոսը:
Մանրամասները՝ տեսանյութում։
