Ադրբեջանը ՀՕՊ զորավարժություններում իսրայելական առաջադեմ հրթիռներ է փորձարկել․ Haaretz

Ադրբեջանի ՊՆ-ն նախօրեին հայտնել է Զինված ուժերի հակաօդային պաշտպանության լայնամասշտաբ զորավարժությունների մասին, այդ թվում՝ իսրայելական արտադրության Barak-8 ER հակաօդային պաշտպանության համակարգով, գրում է իսրայելական Haaretz-ը:

Ըստ հայտարարության՝ Barak-8-ը հայտնաբերել և ոչնչացրել է «պայմանական թշնամու կողմից արձակված բալիստիկ հրթիռը»։

Լրատվամիջոցը գրում է, որ Իսրայելը ռազմավարական դաշինքի մեջ է Ադրբեջանի հետ վերջին երկու տասնամյակների ընթացքում՝ Բաքվին վաճառելով միլիարդավոր դոլարների զենք։ Իսկ դրա դիմաց Ադրբեջանը, ըստ աղբյուրների, Իսրայելին մատակարարում է նավթ և մուտքի հնարավորություն դեպի Իրան:

Ըստ Ադրբեջանից պաշտոնական հաղորդագրությունների՝ Իսրայելը տարիների ընթացքում Բաքվին վաճառել է ամենաառաջադեմ սպառազինություն՝ բալիստիկ հրթիռներ, հակաօդային պաշտպանության և էլեկտրոնային պատերազմի համակարգեր, կամիկաձե անօդաչու սարքեր և այլն:

Լրատվամիջոցի պնդմամբ՝ արտասահմանյան ԶԼՄ-ները գրում են, որ Ադրբեջանը թույլ է տվել «Մոսադ»-ին ստեղծել առաջնային մասնաճյուղ՝ վերահսկելու, թե ինչ է կատարվում Իրանում, և նույնիսկ օդանավակայան է պատրաստել, որը նախատեսված է Իսրայելին օգնելու համար, եթե նա որոշի հարձակվել Իրանի միջուկային օբյեկտների վրա: Երկու տարի առաջվա զեկույցներում ասվում էր, որ «Մոսադ»-ի գործակալները, որոնք գողացել էին Իրանի միջուկային արխիվը, այն Իսրայել էին տարել Ադրբեջանի տարածքով:

Իսրայելն ու Ադրբեջանը 2011 թվականին իրենց հարաբերությունները հասցրին նոր մակարդակի՝ 1,6 միլիարդ դոլար արժողությամբ հսկայական գործարքով, որը ներառում էր «Barak» հրթիռների մարտկոց, ինչպես նաև «Searcher» և «Heron» անօդաչու թռչող սարքեր:

Մարտին էլ Haaretz-ի հետաքննությունը պարզել էր, որ վերջին յոթ տարիների ընթացքում ադրբեջանական Silk Way Airlines ավիաընկերության կողմից իրականացված 92 բեռնատար չվերթներ վայրէջք են կատարել Օվդա ավիաբազայում․ Իսրայելի միակ օդանավակայանը, որով կարող են պայթուցիկներ մուտք գործել և դուրս գալ երկրից:

Նշվում է, որ մարտից ի վեր ադրբեջանական ևս 11 չվերթ է իրականացվել, որից 5-ը՝ վերջին երկու շաբաթվա ընթացքում։ Ստացվում է՝ 7 տարվա ընթացքում, ընդհանուր առմամբ, 103 չվերթ։

Էմմա Չոբանյան