ԵՄ-ն չեղարկել է մի շարք ռուսաստանցի գործարարների նկատմամբ սահմանված պատժամիջոցները

Ռուսաստանցի գործարար Գրիգորի Բերյոզկինի, միլիարդատեր, ազգությամբ ադրբեջանցի Ֆարհադ Ահմեդովի, «Օզոնի» նախկին ղեկավար Ալեքսանդր Շուլգինի և ռուսական բանակի գնդապետ Գեորգի Շուվաևի (մահացել է 2022 թվականին Ուկրաինայում) դեմ ԵՄ-ի սահմանած պատժամիջոցները չեղարկվել են։ Այս մասին ասվում է ԵՄ պաշտոնական ամսագրում հրապարակված հաղորդագրությունում, փոխանցում է BBC-ի ռուսական ծառայությունը։

Այն, որ ԵՄ-ն չի երկարաձգելու պատժամիջոցները չորս ռուսաստանցիների նկատմամբ, հայտնի էր դարձել նախօրեին։ Նրանց անունները, սակայն, հստակ չէին նշվում։ Եվրոպական պատժամիջոցները երկարաձգվում են վեց ամիսը մեկ, իսկ գործող սահմանափակող միջոցների ժամկետը լրանում է սեպտեմբերի 15-ին։

Սեպտեմբերի սկզբին հայտնի էր դարձել, որ Եվրոպական ընդհանուր իրավասության դատարանը որոշել է չեղարկել Ալեքսանդր Շուլգինի նկատմամբ պատժամիջոցները։ Դեռևս 2012 թվականին Ռուսաստանում իր հիմնական ակտիվները վաճառած Ֆարհադ Ահմեդովի դեմ պատժամիջոցներն էլ, ըստ լրատվամիջոցների, հենց սկզբից թյուրիմացություն էին թվում։

Հավելենք, որ Ֆարհադ Ահմեդովն այժմ բնակվում է Ադրբեջանում։

Factor TV-ն ավելի վաղ անդրադարձել էր Ադրբեջանում նրա դեմ հետապնդումներին ու Արցախյան 44-օրյա պատերազմում նրա դերակատարմանը։

Առայժմ պարզ չէ, թե ինչու է Եվրահանձնաժողովը վերացրել պատժամիջոցները ESN հոլդինգի և ՌԲԿ մեդիա հոլդինգի սեփականատեր Գրիգորի Բերյոզկինի նկատմամբ, որը պատժամիջոցների որոշման մեջ նշվում է որպես «Պուտինի կամակատար»։

Էմմա Չոբանյան