07.12.2025 | 20:49
Կարծում եմ ճիշտ կլինի, որ կիրակնօրյա պատարագներից առաջ եկեղեցիներում երգչախմբերը կատարեն օրհներգը․ Փաշինյան
Արտոնություն` Աշոտ Արսենյանին, որի կառուցած թաղամասում պաշտոնյաները բնակարաններ են գնում
Քաղաքականություն
14.09.2023 | 11:04
ՀՀ կառավարությունը 102 մլն դրամի մաքսային տուրքից ազատելու արտոնություն կտա ՀՀԿ-ական նախկին պատգամավոր Աշոտ Արսենյանին պատկանող «Ջերմուկ Գրուպ» ընկերությանը։ Այս մասին Factor.am-ը տեղեկանում է Կառավարության կայքից։
Արսենյանի ընկերությունը նախատեսում է իրականացնել 6․6 մլրդ դրամի ներդրում հումքի ձեռքբերման համար և 1․7 մլրդ դրամի ներդրում քարշակների և կիսակցորդների ձեռքբերման համար։ Նախատեսվում է ներդրումային ծրագրի շրջանակներում ստեղծել 32 նոր աշխատատեղ՝ մինչև 460 հազ դրամ միջին ամսական աշխատավարձով։
Հիշեցնենք` Արսենյանի որդին` Վահագն Արսենյանը, Փաշինյանի ղեկավարած ՔՊԿ ցուցակով դարձել է Ջերմուկի քաղաքապետ։ Իշխանության բարձրաստիճան առանցքային ներկայացուցիչներ` Պաշտպանության նախարար Սուրեն Պապիկյանը, Հակակոռուպցիոն կոմիտեի նախագահ Սասուն Խաչատրյանը, ԱՄՆ-ում ՀՀ դեսպան Լիլիթ Մակունցը, վարչապետի աշխատակազմի ղեկավար Արայիկ Հարությունյանը բնակարաններ են գնել Արսենյանների «Բյուրեղ» բնակելի թաղամասում։ Հետաքննող լրագրողներն այս գործարքներից որոշներում կոռուպցիոն ռիսկեր են տեսնում։
Հիշեցնենք, որ գործարար Արսենյանի որդուն մեղադրանք էր առաջադրվել զինվորական ծառայությունից առերևույթ ապօրինի հիմքով ազատվելու համար: Քննչական կոմիտեից հայտնել են, որ այս տարվա հուլիսին ավելի վաղ հարուցված քրեական գործի հատկանիշներով Վահագն Արսենյանին մեղադրանք է առաջադրվել Քրեական օրենսգրքի 327 հոդվածի 2-րդ մասի 2-րդ կետի հատկանիշներով` զինվորական ծառայության զորակոչից խուսափում` փաստաթուղթ կեղծելու կամ խաբեության այլ ճանապարհով: Հետագայում, սակայն, այս գործը կարճվեց, Վահագն Արսենյանն էլ հայտնվեց ՔՊ-ի ցուցակում։
Նարեկ Կիրակոսյան
