Քաղաքականություն
14.09.2023 | 12:05
Եվրախորհրդարանը Հաագայի Միջազգային քրեական դատարանին կոչ է արել Բելառուսի նախագահ Ալեքսանդր Լուկաշենկոյի ձերբակալելու օրդեր տալ, փոխանցում է DW-ի ռուսական ծառայությունը։ Նախօրեին ընդունված բանաձևում Լուկաշենկոն անվանվում է Ռուսաստանի կողմից օկուպացված Ուկրաինայի շրջաններից ավելի քան 2150 երեխաների բռնի տեղահանման մեղսակից․ ըստ բանաձևի՝ երեխաները տեղափոխվել են այսպես կոչված «բուժական ճամբարներ», որտեղ «նրանք ենթարկվել են ռուսականացման և գաղափարական մշակման»։
Եվրախորհրդարանը համարում է, որ Լուկաշենկոն ու նրա ռեժիմը պատասխանատու են ռազմական հանցագործությունների համար այնպես, ինչպես Վլադիմիր Պուտինն ու երեխաների մարդու իրավունքների պաշտպան Մարիա Լվովա-Բելովան։
Բանաձևը դատապարտում է Լուկաշենկոյի ռեժիմի մասնակցությունը Ուկրաինայի դեմ «Ռուսաստանի անհիմն, անօրինական և չհրահրված ագրեսիվ պատերազմին»։
Եվրախորհրդարանը գտնում է, որ Ռուսաստանի կողմից Ուկրաինայի դեմ ագրեսիայի հանցագործության համար հատուկ միջազգային տրիբունալը պետք է իրավասություն ունենա հետաքննելու ոչ միայն Պուտինի և Ռուսաստանի քաղաքական ու ռազմական ղեկավարության, այլև Բելառուսի ղեկավարության գործողությունները։ Դրա համար էլ եվրապատգամավորները կոչ են արել ԵՄ-ին ու ԵՄ անդամ երկրներին միջոցներ ձեռնարկել, որոնք անհրաժեշտ են «ապահովելու Բելառուս պաշտոնյաների քրեական հետապնդումը, որոնք մեղսակից են ագրեսիային, ռազմական հանցագործություններին, մարդկության դեմ հանցագործություններին և Ուկրաինայի դեմ կատարված ցեղասպանության հանցագործություններին»:
