Թուրքական դատարանն արդարացրել է Ստամբուլի ընդդիմադիր քաղաքապետ Էքրեմ Իմամօղլուին

Թուրքական դատարանն արդարացրել է գլխավոր ընդդիմադիր Ժողովրդահանրապետական կուսակցությունից Ստամբուլի քաղաքապետ Էքրեմ Իմամօղլուին «հանրային պաշտոնյային վիրավորելու» գործով՝ իշխող «Արդարություն և զարգացում» կուսակցությունից Թուզլա շրջանի ղեկավար Շադը Յազըջիի հասցեին հնչեցրած խոսքերի համար, գրում են թուրքական լրատվամիջոցները։

Անադոլուի 16-րդ Քրեական առաջին ատյանի դատարանը որոշում է կայացրել, որ Շադի Յազըջիի մասին 2022 թվականի հոկտեմբերին արարողության ժամանակ Իմամօղլուի հնչեցրած խոսքերը քաղաքական քննադատություն են, այլ ոչ վիրավորանք։

Նախկինում Ստամբուլի Անատոլիայի գլխավոր դատախազությունը մեղադրական եզրակացության մեջ Իմամօղլուի համար պահանջել էր առավելագույնը 2 տարի 4 ամիս ժամկետով ազատազրկում և քաղաքական գործունեության զբաղվելու արգելք։

Ըստ մեղադրական եզրակացության՝ Իմամօղլուն վիրավորել է Յազըջին, որին 2022 թվականի հոկտեմբերի 25-ին Թուզլայում ջրերի մաքրման կայանի բացման արարողության ժամանակ սուլել էին։ Իմամօղլուն, որը ելույթ էր ունեցել անկարգությունների ժամանակ, մեղադրվում էր այն բանի համար, որ իրեն վայել պահվածք չի դրսևորել և արտահայտություններ է արել, որոնք սրել են միջադեպը։

Դատախազությունն Իմամօղլուի նկատմամբ հետաքննություն էր սկսել Յազըջիի բողոքի հիման վրա։ Իմամօղլուն, որը ցուցմունք է տվել, ասել է, որ մի քանի անգամ փորձել է հանգստացնել ցուցարարներին և չի վիրավորել Յազըջիին։ Նա նշել էր, որ կարիք չկա լրացուցիչ բացատրության, քանի որ իրեն ուղղված մեղադրանքները քաղաքական դրդապատճառներ ունեն:

Դատարանը, որին ուղարկվել է մեղադրական եզրակացությունը, արդարացրել է Իմամօղլուին՝ լսումների անհրաժեշտություն չտեսնելով։

Մեկ այլ գործով, սակայն, Իմամօղլուի նկատմամբ 2 տարի 7 ամիս ժամկետով ազատազրկման դատավճիռ է կայացվել, ինչպես նաև քաղաքական գործունեության արգելք՝ Գերագույն ընտրական խորհրդի (YSK) անդամներին ենթադրյալ վիրավորելու մեղադրանքի համար, որը պետք է հաստատվի վերաքննիչ դատարանի կողմից։

Էմմա Չոբանյան