20.06.2026 | 14:53
Ձորագետում հայտնաբերված վիրավոր արծվին տեղափոխվել է հատուկ կենտրոն
Ինչո՞ւ է Հայաստանը 100 միլիոնավոր դոլարների զենք գնում․ Ադրբեջանի Մեջլիսի նախագահը դժգոհել է ՀՀ-ի կողմից սպառազինություն ձեռք բերելու կապակցությամբ
Քաղաքականություն
13.09.2023 | 22:17
Ադրբեջանի իշխանությունները շարունակում են դժգոհել, որ Հայաստանը զենք և սպառազինություն է ձեռք բերում։ Մասնավորապես, Ադրբեջանի Միլլի Մեջլիսի խոսնակ Սահիբա Գաֆարովան, որը պաշտոնական այցով Բուլղարիայում է, հանդիպումների ընթացքում Հայաստանի հասցեին կեղծ մեղադրանքներ է հնչեցրել՝ բողոքելով, որ Հայաստանը զինվում է։
«Եթե Հայաստանն իսկապես խաղաղություն է ուզում և հայտարարում է, որ ճանաչում է Ադրբեջանի տարածքային ամբողջականությունը, ինչո՞ւ է այդքան արագ զինվում։ Կամ ինչո՞ւ է Հայաստանի նման աղքատ երկիրը 100 միլիոնավոր դոլարների զենք գնում»,- հայտարարել է Գաֆարովան։
Նա նշել է, թե Հայաստանը, իբր, «ձեռք բերած զենքերն օգտագործում է Ադրբեջանի ինքնիշխան տարածքի դեմ»
«Սա խոսում է այն մասին, որ Հայաստանի արագ սպառազինումը խաթարում է խաղաղության հեռանկարները և հանգեցնում նոր սպառնալիքների տարածաշրջանի համար»,- ասել է Ադրբեջանի Մեջլիսի ղեկավարը։
Ուշագրավ է, որ սպառազինության ձեռքբերման մասին խոսում է մի երկրի պաշտոնյա, որն ամենօրյա ռեժիմով զինամթերքի ու սպառազինության մատակարարումներ է իրականացնում Իսրայելից ու Թուրքիայից և շարունակում է պատերազմով սպառնալ Հայաստանին ու Արցախին։
Ի դեպ, ավելի վաղ նման հայտարարությամբ էր հանդես եկել նաև Ադրբեջանի նախագահ Իլհամ Ալիևը Հնդկաստանի դեսպանի հավատարմագրերը ընդունելիս։
«Եթե Հայաստանն իսկապես խաղաղություն է ուզում Ադրբեջանի հետ, ինչո՞ւ է 100 միլիոնավոր դոլարի զենք գնում։ Հայաստանի արագ սպառազինումը նոր սպառնալիքներ է ստեղծում, և այդ քաղաքականությունը կարող է հանգեցնել տարածաշրջանի համար նոր սպառնալիքների»,- ասել էր Ալիևը։
Էմմա Չոբանյան
